نه یازیم ؟
شاعیرم چونکو وظیفه م بودور اشعار یازیم
گؤردوگوم نیک و بدی ، ائیلییم اظهار یازیم
گونو پارلاق ، گونوزو آغ ، گئجه نی تار یازیم
کجی کج ، اگرینی اگری ، دوزو هموار یازیم
نییه بس بویله بره لدیرسن آغاران گؤزونی ؟
یوخسا بو آینه ده اگری گؤرورسن اؤزونو ؟
…
شعره مشغول ائده ره ک خاطر غم مایلیمی
قویورام قنشریمه کاغذیمی ، چرنیلیمی
گلیرم یازماغا بیر کلمه دوتورسان الیمی
قورخورام یا نه ایچون ؟ چونکه ، که سیرسن دیلیمی
ای عجب من کی صداقت یولونو آزمیورام
هله گوردیکلریمی دؤرتده بیرین یازمییورام
…
هله من دؤرتده بیرین یازمیورام ، کارینا باخ
اوزومو گونده سویورسن بوقدر ، عارینا باخ
اؤزون انصاف ائله افکارینا اطوارینا باخ
ایسته مز سن یازام اؤز عئیبلی کیردارینا باخ
کیشی سن عئیبینه باخ منله عبث جنگ ائله مه
اؤزونو هم منی بو باره ده دیلتنگ ائله مه
…
گؤریر ارباب قلم غایه اعمالینیزی
مندن آرتیق یازا بیلمه کده ایکن حالینیزی
یازمیر اونلار داهی اون دؤرتده بیر افعالینیزی
اؤزونوزسوز اولارا یازدیران احوالینیزی
یوخسا بو عئیب دن عالمده مبرادیر اولار
بئله الچاق یازیدان مین کره اعلادیر اولار
…
نئجه من دؤرتده بیرین یازماغا هم اهل قلم
قورخور اوندؤرتده بیرین یازماغا هم اهل قلم
سن اگر سؤز وئره سن « قورخما قیل احوالی رقم »
وضع حالین یازیلیرسا زیلی زیل یا بمی بم
ائله بیر حاله دوشه رسن کی توکون بیز بیز اولار
اگنینه گئیمه شئی تاپماسان آستار اوز اولار
Filed under: باشقا شاعیرلر, تورکی شعرلر Türkcə şeirlər Tagged: | آذری شعرلری, تورکی شعر, شعرلر
[...] نه یازیم – تورکی شعر [...]