قوشماجالار

قوشماجالار

 

اوشاقلارين سؤز خزينه سي چوخالسين و ديللري داها دا آچيلسين دييه ،كئچميش زامانلاردان بوگونه كيمي چوخلو قوشماجالار يارانميشدير.

چوخ قديم چاغلاردان آغيزدان آغيزا ، نسيلدن نسيله دولاناراق اليميزه چا تميش قوشماجالارين فورم باخيميندان اؤزونه مخصوص اؤزلليكلري وار:

قوشماجالار يئددي هيجالي شعرلردير كي اوندا قافي هلرين عومومي دوزولوشو بئله دير:

(aa bb cc dd…)

اوندان علاوه ميصراعلار بير بير اوشاغين يادينا دوشسون دئيه هر بئيتين اولينده گلن كلمه لر اوندان قاباقكي ميصراعدا دا گلميشدير كي بو دا شعرلرين يادا دوشمه سي و تداعيمعاني اولماسيندا قوشماجاسيندا آلتينا « اوٍشودوم ها اوٍشودوم » اوشاغا يارديمچي اولور .مثلا آشاغيدا وئريلن مشهور چيزگي چكيلن كلمه لر دئديگيميز كيمي تكرارلانميشدير:

 

اوشودوم ها اوشودوم

داغدان آلما داشيديم

 

آلماجيغيمي آلديلار

منه ظولوم قيلديلار

 

من ظولومدن بئزارام

درين قويو قازارام

 

درين قويو بئش گئچي

هاني بونون ائركجي

 

ائركج قازاندا قاينار

قنبر يانيندا اوينار

 

قنبر گئتدي اودونا

قارغي دَيدي بودونا.

 

قارغي دئييل قميشدي

بئش بارماغي گوموشدو

 

گوموشو وئرديم تاتا

تات منه داري وئردي

 

داريني سپديم قوشا

قوش منه قاناد وئردي

 

قانادلانديم اوچماغا

حق قاپيسين آچماغا

 

حق قاپيسي كليدلي

كليد دوه بوينوندا

دوه گيدان يولوندا.

 

باشقا اؤرنكلر:

 

آ تئشتي ، تئشتي، تئشتي

آ تئشتي ، تئشتي، تئشتي

ووردو گيلاني كئچدي

ايكي خوروز ساواشدي

بيري قانا بولاشدي

قان آخدي چايا دوشدو

چايدان بيلديرچين اوچدو

بيلديرچين بيللي بيللي

گل اوْخو بيزيم ديلي

بيزيم ديل اورمو ديلي

اورمو بوردان اوزاقدي

دريا اوندان قاباقدي

 

ياغدي ياغيشلار

بانلادي قوشلار ،

حيوان گاميشلار.

آراندا قيشلار.

 

ال اله ها ال اله

سو گلدي لولهلوله.

سويون باشي بيزيمدي

چشمه داشي سيزيندي.

باجيم  گئديب، كهريزه

سودان گتيرسين بيزه.

 

قاشقاي ائللري كؤچنده قوزولارين ، چپيشلرين آپاريجيسي كيچيك اوشاقلار اولور . اونلار يول بويو يورولماسينلار دئيهبيرليكده بو قوشمالاري اوخورلار:

 

قوزولاريم گئدين

اوبا گئتدي قالمايين

هويه ،هويه، هو گلدي

كؤرپه قاچين قورد گلدي.

 

باشقا بير قاشقاي قوشماجاسي:

 

ياغيش ياغدي ياغاياغا

اوجو دوشدو بيزيم باغا.

عميم قيزي سولطان آغا

گل ده گئدك اويناماغا.

اويناماغين واختي دئييل

قيزيل گولون تاختي دئييل.

 

سون زامانلاردا يارانان قوشماجالاردان دا اؤرنك اوْلاراق آشاغيداكيلاري گؤسترمك اوْلار:

 

مينديم فايتونا

آتلار ييخيلدي

مينديم داشقايا

تكري سيندي

مينديم ائششگه

ساغ قيچي سيندي

مينديم قاطيرا

سول قيچي سيندي

مينديم ماشينا

بنزين قورتولدو

گئتديم ناهارا

ناهار قورتولدو

گئتديم ائوميزه

دووار ييخيلدي

قالديم آلتيندا

ياخام قورتولدو

 

تورشولو آش ايچمرم

دروازادان گئچمرم

دروازا منيم اوْلسون

قيرميزي دونوم اوْلسون.

گئييم،گئديم تهرانا

تهراندا تويوم اوْلسون

قيزلار گلسين تويوما

قوربان اوْلسون بويوما.

 

كئچل،كئچل باميه

گئتدي مريضخانه يه.

مريضخانا باغليدي

كئچلين باشي ياغليدي.

كئچل دئير واي باشيم

قازاندا قاينار آشيم.

آشيمي ايچن اوْلايدي

باشيما س….. اوْلايدي.

بالاجا چيراق دود ائيله دي

صدامي نابود ائيله دي

 

اوشاق اويونلاري ادبياتي

 

اوشاق اويونلارينين دا بير بعضا موعيّن ادبيات (نظم) ايله ايجرا اوْلور مثلا:

 

آنا مني قوردا وئرمه

چادرامي سويا وئرمه

 

گويده نه وار ؟

گؤي مينجيغي.

يئرده نه وار؟

يئر مينجيغي .

بنؤوشه بنده دوشه

بيزدن سيزه كيم دوشه

…….دوشه

الاله ، دويمه دله

من گئديرم بابام گيله.

بابام منه باشماق آليب،

بير تاي سنه، بير تاي منه.

 

اوستا دئدي

اوستا نه دئدي؟

اوستا بلخدن دئدي.

نرگيزه باخ نرگيزه

تختيوي گؤتور گل بيزه. !

 

آي هوستانا هوستانا

بيري دوشدو بوستانا

ووردولار قيچي سيندي

آپارديلار حكيمه

حكيم توتدو قيچيني

آي هولا هولا هولا

بورجون اوجو قيرميزي

گؤتور بؤركووو وور بيزي !

 

گيزلن پاچ

گلديم قاچ !

Advertisements

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: