مثنوی مولانا تورکی دیلده 200 – 246

تورکی مثنوی ابیات ۲۰۰ – ۲۴۶

 

اول قيزا ساغلامليق اولدو ديبده پاي

آلديلار كام بيربيريندن آلتي آي

 زرگره بير شربت ائتدي پاي حكيم

ايگنه يه ساپلاتدي ائتدي زاي حكيم

گول تكين رنگين ساراتدي خسته ليك

قالمادي قيزدا اونا ديلبسته ليك

 خسته ليك دن اولدو چيركين، وه ساري

گئتدي ايستك قالدي ييرتيق آستاري

٢٠٥  عشقلر هر يانداكي رنگ اوزره دير

واز گئچ اوندان نقدي آخير نيسيه دير

 ايلك باشدان ننگ اولايدي كاش اودا

پاك قالاردي پيس قضاوتدن بودا

 چاي كيمي آخدي گؤزوندن قانلي ياش

ازمه يه باشين گؤزه لليك اولدو داش

 طوووزا دوشمن ياراندي قويروغو

چوخ شاهي اؤلدوردو اوستون اولدوغو

 اووچولار سين سين گزيرلر جانيمي

گؤبه ييمدير آخيدان آل قانيمي

٢١٠  تولكو تك باشدان آتارلار داشيمي

دريمه خاطير كسللر باشيمي

 فيلچي لر فيل تك تؤكورلر قانيمي

سومويه خاطير آليرلار جانيمي

 اؤزگه يه خاطير منه آغري قييان

بيلمه ييركي هئچ زامان ياتماز بو قان

سانما كيم بير گون آخان قانيم ايتر

داش آتان آخيرده باشدان داش ييير

 نه قدر سالسا اوزون كؤلگه دووار

قاييدار ديبده دوواردان آسلانار

٢١٥  دونيا داغدير گؤردويون ايشلر نيدا

قايتارار داغلار سنه عكسي صدا

 ائتدي زرگر تورپاغين آلتين مكان

تاپدي قيز قوندارما ايستك دن امان

 اؤلونون گودمه قبيردن دورماغين

قورودار بوزتك اؤلوم ايستك تاغين

 جانلي عشق اولسا گولر يانقين چمن

قلبدن لاكين ايتر گؤزدن ايتن

 اؤلمزين عشقين قازان كيم باقي دير

جانينا، جان ساغه ريندن ساقي دير

٢٢٠  آختار اول عشقي كيم ايستر اولييا

تاپديلار اوندان بؤيوكلوك انبيا

 سؤيله مه يوخدور بيزه يول شاه ايچون

ال آچيقلار خيضرلاردير راه ايچون

 حكيمين اول زرگري اؤلدورمه سي

قورخو يا اوومماق دگيلدير مايه سي

زرگري اؤلدورمه دي او شاه ايچون

جانيني آلدي بؤيوك آللاه ايچون

 خيديرين اوغلانجيغي اؤلدورمه نين

سيرريني هر بوش بوغاز بيلمز يقين

٢٢٥ دوشمه سن هر نه دئسن حقدن اوزاق    

حقين آيدين وحيينه اولسان دوداق

 جان وئرن جان آلسادا يئرسيز دگيل

حقه قولدور ايشلري سيرسيز دگيل

 تاپشير ايسماعيل تك باش تيغينه

سؤيله يا رب ده يمه سين داش تيغينه

تا گوله جانانيله جانين سنين 

ائيله كيم پاك جاني گولدو احمدين

 عاشيق اوندا قالديرار شانليق مئيين

اؤلدورر جانانه خاطير سئوديگين

٢٣٠  سانما شاه شهوتدن اؤترو تؤكدو قان

قيپچين، ايري باخماغيندان بير اوتان

ظن ائتمه دوزلويه قاتدي رييا 

نقصدن قوپموش هارا، آشقار هارا؟

 بونا خاطيردير قازان آلتدان كؤتوك

تا گوموشدن آيريلا بيلسين كؤپوك

دوزله ايري قوي دايانسين اوز اوزه 

قاينار آلتون آشقارين وئرسين اوزه

 اولماسايدي ايشلري ايلهامينن

ييرتيجي ايت بير اولاردي شاهينن

٢٣٥  سيلكينيب دوشموشدو شهوتدن قيراق

پيسه بنزر دوندا، گؤر سنميشدي حاق

 گمي يه چاتسا خيديردان بير خطر

وار اونون سينديرماسيندا مين ظفر

 قوي كليم اولسون گؤزونده بير دوزاق

پيردن گل دوشمه سن بير آن اوزاق

او قيزيل گولدور يانيلما قان دگيل 

عقلدن سرخوش عاغيلدان يان دگيل

 ايستگي اولسايدي قان تؤكمك اونون

كافيرم توتسايديم اَولدن سونون

٢٤٠  عرش تيترر بويلاماقدان ظاليمي

چوودورار حقدن اوشونمز عاليمي

شاهدير، شاهلار شاهي، اوستون بيلن 

خاصيدير آللاهه، غيريندن اوزن

 اؤلدوره هر كيمسه ني بير بئيله شاه

بختيار ائيلر اونو چكديرمز آه

 گؤرمه سئيدي خئيرين اوندا پادشه

اللري اول زرگره قازمازدي چه

 قانلي بادكشدن اوشاق تيترر ولي

آناسي چيلتيك چالار اوينار الي

٢٤٥  بير اؤلومجيل جان آلار مين جان وئرر

عاغلينا سيغماز نه وار، اوندان وئرر

دوشموسن يولدان قيراق حقدن يابان 

تا گؤرورسن اؤزونو حقه قاپان

Advertisements

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: