مثنوی مولوی تورکی دیلده 100-150

مثنوی تورک دیلینده ابیات ۱۰۰ – ۱۵۰

 

پاديشاهين طبيبي خسته نين حاليني يوخلاماقدان اوترو باش ينين اوستونه آپارماسي

 

 

 اول ييغينجاق ائيله كي چاتدي باشا

ايچ سارايا گئتديلر شاهلا قوشا

 خسته قيز دان آچدي صؤحبت بير زامان

خسته ني آخير اونا وئردي نيشان

 گؤردو ديقتله حكيم قاروره سين

أوخودو بنزينده گيزلين نامه سين

 سؤيله دي بوي بويلايانلاردان دوا

خسته نين حقينده اولموش بير جفا

١٠٥  استعيذُ ايفتيرادان مين كره

بيلمه مزليكله ياخيرميشلار قره

 دردي گؤردو ايش اونا اولدو عيان

ليك شاها ائتمه دي سيرري بيان

 اودونون جينسين وئرر توستو لووا

آنلادي صفرا دگيل عيلت لووا

 گؤردو او آلوده ليكدن داغليدير

جيسم ساغلامدير اوركدن باغليدير

قلبدير آلوده ليكلر گوزگوسو 

يوخ اورك بيمارليغيندان گوجلوسو

١١٠  عشق اوصطورلابدير حق سيررينه

بنزه مز سئوگي قاداسي غيرينه

 عشقدير جان مولكونون سر ريشته سي

يوخ گؤزه ل عشقين آواندي ترسه سي

 هر نه بويدا ائيله سم عشقي بيان

عشقه چاتديقدا اولار ضعفيم عيان

 سؤزله گر آيدينلاشاندير سيرريميز

اوندان آيدينراختي ديلسيز عشقيميز

 جان آتيردي يازماغا مغرور قلم

عشقه تا چاتدي قيچي اولدو قلم

١١٥  باتدي شرحينده زيغا عقل ائششگي

عشقي عشق آنلار نه عاغلين كؤششكَي

 چالما كيپريك باخ گونه اولما ذليل

گونشه گر ايسته ييرسن بير دليل

 وئرمه دی كؤلگه بيزه گوندن نيشان

شمس جانا نور يايير خود جاندي جان

 اويدورار كؤلگه سني دستان كيمي

آي سينير گون چيتلاياندا جان كيمي

 خود گونشدن دونيادا يوخدور غريب

ليك جانين شمسي باتمازدير عجيب

١٢٠  بير گونش واردير اگر عالم آرا

ميثليني چكمك اولار مومكون يارا

اود كوره سيندن ائشيكدير شمس جان

كيمده وار قودرت ائده ميثلين بيان

 ذاتينين يئرلشمه سي ذئهنه محال

پس محالين نقشي ده اولموش محال

 سؤز آچاندا شمس دن باتدي گونش

شمس اينن شمس اولماغين داندي گونش

 واجيب اولدو شمس آدي گلمك همان

باغيشين عالملره ائتمك عيان

١٢٥  بو ساعات جان دامنيمدن آسلانيب

ايي آليبدير يوسيفيندن حاللانيب

 قويما چؤكدورسون بيزي غملر ديزه

آچگينان سؤز حاللي گونلردن بيزه

شمس سيز دونيا نه دير بير آلدانيش

گل بيزه خوش گون سورنلردن دانيش

 تا كي گولسون يئر گؤيون گؤلمز اوزو

سورمه لن سين شوقدان عاغلين گؤزو

 ايسته مه مندن، دئديم من ايتميشم

ساي ندير فهمين داشين من سيتميشم

سؤيله سه هر نه اوزونده اولمايان

ايپينه دوزمه اودون اي مئهربان

ايندي كي يوخدور تو كومدن ده خبر

نه دييه بيللم او ياردان نوكته لر

 اوره يين قان اولدوغون هيجران سؤزون

اينديليك بوشلا هله دئشمه كؤزون

 سؤيله دي اؤلدوم آجيمدان گل دويور

دورما، كسگيندير زامان اوخ تك اويور

 صوفي إبن الوقت اولار اي دوست بيل

گله جك دن سؤيله مك اويغون دگيل

 نيسيه دن يوخلوق دوشر وار مولكونه

صوفي امما نقدي وئرمز مومكونه

١٣٥  گيزلي توتماق خوشدو سيررين ديلبرين

بير حيكايت ايچره دينله سؤزلرين

 نه گؤزه لدير كؤكله يك رمزين تارين

آيري دونلاردا دييك سيررين يارين

 سؤزده منلن سؤيله دي ياشماقسيز اول

دونگه يه چكمه سؤزو يورما اوغول

سؤزو پورچوم سوز دانيش بار وئر اگيل

يارينان كؤينكلي ياتماق دوز دگيل

 سؤيله ديم ديلبر سويونسا پالتارين

سنده سنليكدن نيشان قالماز ساغين

١٤٠  اؤز قابينجان ايسته آرتيق ايسته مه

توو گتيرمز چؤپ داغا گل بوي دئمه

 اول گونش كيم عالمي نورلانديرار

ياخينا گلسه ياخار اودلانديرار

 تبريز ين شمسيندن آرتيق سؤز دئمه

فيتنه سالما، قان آخيتماق گؤزله مه

 سؤزو باشدان سؤيله سونسوز دور بو سؤز

باسما سونسوزلوق اودوندان قلبه كؤز

 

 

او ايلاهي حكيمين پاديشاهدان كنيزين درديني تاپماغا خاطير خلوت ايسته

مه سي

 

 

 سؤيله دي اي شاه بير خلوت يارات

سارايي يان يؤوره دن بير دم بوشالت

١٤٥  آسماغا حالسيز قيزا قالسيز قولاق

اولماسين درده دووارلاردا قولاق

 ائو بوشالدي قالمادي بير باش چكن

قالدي بير قيز بير حكيم بيرده لگن

يوموشاق آستا سوروشدو شهريني

شهريني بيلمك له بيلسين درديني

 سؤيلدي كيمدير سنه اوردا تانيش

گل تانيشلاردان منه بير بير دانيش

 بنزي الده سؤيله دي اول مهربان

چوخلارا اولموش فلك اَيري پالان

١٥٠  آياغين داللار ائشن بير كيمسه نه

آياغين آستا قويار ديز اوستونه

 

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: