مثنوی مولوی تورکی دیلده 150- 200

مثنوی معنوی تورکی دیل ده ابیات ۱۵۰ – ۲۰۰

 

تيكاني ايگنه اوجوينان آختارار

تاپماسا آغزين سويوينان ياشلايار

 اولسا بارماقدا تيكان بونجا چتين

قلبده اولسا اولار يوز قات چتين

 هر گلن گؤرسئيدي قلب ايچره تيكان

ال سووورمازدي باشا غمدن سامان

 بير تيكان قويماقلا قويروق آلتينا

ائششگي سونجوقلادير اهل زينا

١٥٥  سونجوق آتديقجا اونو سانجير تيكان

تيكاني چكسن تاپار ائششك امان

 تيكاني دفع ائتمه يه ديلسيز سوپا

سونجوغا قالخير ده يير باشدان باشا

 تيكاني جاندان چكن آدليم حكيم

ال ووروردو يوخلاييردي چوخ حليم

 سؤز چكيردي اول كنيزكدن متين

يوموشاق، ائهمال، آدين، دوستون يئرين

 سؤيله ييردي او، حكيمه قيصه لر

آشنالاردان، اوزاقلاردان نلر

١٦٠  ناغيلا ديقت له آسديقجا قولاق

او گودوردو بنزي آتسين، چوخ اوياق

هانكي آدلا او گودوردو آتماسين 

بو يول ايله قصدينه ال تاپماسين

 سايدي بير بير دوستلارين او شهرده

آد آپاردي سونرا آيري شهرده

 ائيله كيم او شهردن دوشدون قيراق

هانكي يئرده ائيله دين چوخ اوتوراق

 آتمادي بنزي گتيردي آيري آد

قاچمادي رنگي ائدنده غيري ياد

١٦٥  سؤيله دي دوزدان چؤركدن موختصر

خواجه لردن، شهرلردن، يوز قدر

 ائو به ائو سؤز آچدي رنگي قاچمادي

شهرلر آدلاندي بنزي آتمادي

 وورمادي بنزي، حكيم هر نه دئدي

تا سمرقنده يئتيشدي قند دئدي

 آتدي بنزي دوشدو قيز حالدان حالا

گؤردو، زرگردير، سبب بونجا حالا

ائله كيم بو سيررا ال تاپدي حكيم

هم دوا هم درده ال تاپدي حكيم

١٧٠  ايسته دي كويون اونا وئرسين نيشان

غاتفر، كؤرپو باشي ائتدي بيان

 آنلاديم عيلت نه دير بو يانماغا

ائيله رم اووسون سني قورتارماغا

 ايشله رم مين مؤعجيزه آغريندا من

كي ياغيشدان گؤزله ير يانقين چمن

 آغرين آلماقدا آناندان دا باشام

درديني آللام يورولماز يولداشام

 آچما سيرريندان گؤزه ل هئچ ياندا قال

پادشاه دا ائيله سه سندن سوال

١٧٥  گيزلي اسراره مزار اولسا اوره ك

آچيلار موشگول اولار حاصيل ديلك

 جوت له شر سير ساخلايان عاقيل بشر

اؤز موراديلا دئدي خيرالبشر

 تورپاغين قوينوندا گيزلن سه ده نه

سيرري نقل ائيلر ياشيل ليقدا سنه

 تورپاق آلتيندا ياتيب آلتون، گوموش

معدنين قوينوندا تاپدي پروريش

 اول حكيمين لوطفو، علمي، وعده سي

هؤردو اول آلوده يه جان ريشته سي

١٨٠  وعده وار دوزگون، گؤزه ل، جان اوخشايان

وعده وار عيشين بوغازين اوخلايان

 وعده سي جوهرلينين جان چاغريسي

وعده سي جوهرسيزين باش آغريسي

 

 

او وئرگي وئريلميش آللاه آدامي نين، قيزين آغريسينين علتيي ني بيلمه سي

 

 

 شاهه اوز دؤندردي اول اؤندن بيلن

بير ايي آنلاتدي شاها بو سيرريدن

 عقله اويغوندور دئدي واردان گئچك

زرگري درمان ايچون حاضير ائدك

 ايسته گلسین زرگري اوردان بورا

باشينا آلتون سووور دؤن سال تورا

 

 

زرگري گتيرمك ايچون شاهين سمرقنده ائلچي لر گؤندرمه سي

 

 

١٨٥  شاه اورا گؤندردي يئتگين ائلچيلر

ايش بيلن لر حقه دوزگون اؤلچولر

 چاتديلار اونلار سمرقنده يئرين

تاپديلار شوخ زرگرين آخير يئرين

اي چيخارلي گوندن آيدين طلعتي 

شهرلرده گزديرن آت، شؤهرتي

 اينجه ليكده اي هونرلي پادشه

بيل، سني سئچدي، قيزيلچي، پادشه

 آلگينان شاهدان بو آلي خلعتي

ائت قبول، اول شاهلارين هم صؤحبتي

١٩٠  گؤرمه ده زرگر توكنمز ثيروتي

آلدانيب قيردي ائويندن اولفتي

 بيلمه دي شاه جاني نين قصدينده دير

دونيانين قئيدينده اولدو تئز اسير

 دؤردامه آت چاپديريب اولدو امين

ظن ائديب خلعت، قاني نين قيمتين

يوللاري، دوزدور قيچين، ايستر يورا

پيس قضا گزمز ولي سندن آرا

 آختاران واختا بؤيوك لوك اللري

دئدي گئت عزرائيل امما تسگري  

١٩٥  چون يئتيشدي يولدان اول غفلت نصيب

شاهه چاتديردي اونو تئزراخ طبيب

 نازيلان يول وئرديلر شاه سمتينه

تا كي اودلانسين طرازين شمعينه

 شه اونون توتدو چوخ آرتيق حؤرمتين

اونا تاپشيردي كيليدين مخزنين

ايسته دي شاهدان حكيم توتسون حنا

كنيزي احسان ائديب وئرسين اونا

 اودونو آلسين قيزين وصلين سويو

وصلدن بلكه اييي اولسون خويو

٢٠٠ شاه اونا وئردي آي اوزلو ديلبري    

اولدو يارلا قول بويون دوشگون پري

 

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: