مثنوی مولوی تورکی دیلده 50 – 100

مثنوی معنوی ترکی دیل ده ابیات ۵۰ – ۱۰۰

 

وئرمه دي بار ائتديلر هر نه دوا

درد آرتدي تاپمادي ناخوش شفا

 خسته قيز ايشگلدي اولدو ياي كيمي

قان ياش آخدي شاه گؤزوندن چاي كيمي

 آرتيريب ايسكنجبين صفرا سيني

ياغ قوروتدو عكسدن ايمعاسيني

 هل له توختاتدي اونون ايسهاليني

اود سودان آلدي دئمك ايمداديني

٥٥  شاه گؤرنده اونلارين عاجيزلييين

مسجيده قاچدي يالين قات، تئز، يئرين

سجده يه باش قويدو گؤزلر توكدو ياش

مؤهر ايسلاندي، اولوب سجاده ياش

 بورلاغانيندان فنانين قوپچاغين

يانديريبدير قلبينين شام تك ياغين

 اي كي هر گيزلين سنه اولموش عيان

پاي وئريبسن، اسگيکه مولك جهان

 اي بيزه آرخادوران آللاهيميز

رحم قيل يان دوشدو سن دن راهيميز

٦٠  سن دئدين گيزلين منه اولموش عيان

گيزليني خوشدور ولي ائتسن بيان

 چون اوره كدن باشلادي يالوارماغا

كرمين درياسي گلدي قايناغا

 آغليييركن يوخويا اوولاندي شه

اويغودا بير پيرينن توشلاندي شه

 بو صاباح بير ياد كيشي ائتسه نوزول

بيل كي بيزدندير دوعا اولموش قبول

 ايش بيلندير بو گلن حئكمت لي دير

چوخ امين دير، دوغرو هم قييمتلي دير

٦٥  وار مزاجيندا حقيقت قايناغي

كاميل اووسوندور اونون توختاتماغي

صوبح اولاندا شاه گودوب وعده چاغين

شرقدن ياخدي گونش اولدوز تاغين

 شاه باخيردي اينتيظارلي كؤشكدن

باش چيخارتسين تا وئريلميش سيرردن

 گؤردو گئندن بير دولو اينسان گلير

گوندور امما كؤلگه ليكده بسله نير

 لاپ اوزاقدان بير هيلال تك گؤرسه نير

واردي. هم يوخدور خييال تك گورسه نير

٧٠  سان، روان ايچره خييالي يوخ ساياق

بير جهان تاپميش خييال ايچره آياق

صولحيله جنگي خييال اوستونده دير 

فخريله ننگي خييال اوستونده دير

 اولييالار اوولايان اينجه خيال

عكسيدير مه رو لرين، گؤرمز زوال

 اويغوسوندا شاها گؤرسنميش خييال

گؤرسه نيردي اول قوناقدا دال با دال

تا كي دوشدو اول قوناغا شاه گؤزو

اؤنله دي غيبي قوناغي شاه اؤزو

٧٥ هر جو تو درياچيدير دريا قوشو 

ايگنه ساپسيز بخيه لنميش دير جو تو

 سنيدين عشقيم منيم، او آلدانيش

توره نر دونيادا لاكين ايشدن ايش

موصطفاسان سن منه من ده عؤمر

قوللوغوندا دورموشام بئلده كمر

 حق گؤزوندن دوشدو ياش تك بي ادب

ايسته پاي وئرسين سنه تانري ادب

 اؤزونو زاي ائتمه دي تك بي ادب

قويدو آفاق ايچره خئيلك، اييلي دب

٨٠  مائيده گؤيدن گليردي آغريسيز

توستوسوز آليش وئريش سيز ايستي سيز

 باشلادي بير عيدده سي واختسيز باني

مرجيمك يوخدور ساريمساخ بس هاني

 دوشدو بيزدن گؤيلرين لوطفو اوزاق

قالدي الده بيل اينن سوولو اوراق

 چوخ آراچي اولدو عيسا حق اوچون

حق ده گؤندردي غنيمت خلق اوچون

 پاي گؤتوردو سوفره دن قارنين گودن

اولدولار پايسيز، ييغيلماز سوفره دن

٨٥  سيتقادي عيساي روح الله كي هان

اسگيك اولماز يئر اوزونده بونجا خوان

بير كريمين سوفره سيندن  » زيلله « ليك

حقي دانماقدير، حريص ليك هرزه ليك

 قاپانيب رحمت ائوي اولدو مؤهور

دار باخيش، دار گؤز گدا لردن اؤتور

 گؤي زكات سيز ياغمايير ائيلير ايبا

دونياني اودلار زينا اوزره وبا

 غوصه دن، غمدن سنه يئتسه ظفر

چيخماغينداندير جيزيقدان موختصر

٩٠  يار يولوندا كيمسه چيخسا حددن

يول چاشاندير، آزديران، آزغين گئدن

 فلكي نورلانديران اولموش ادب

ملكه قويموش، ادب، پاك ليقدا دب

 ايشيغين چالدي قابارماقليق، گونون

من دئمك ياخدي عزازيلين دونون

 

 

شاهين، يوخوسوندا موشتولوق وئريلميش كيمي، او ايلاهي حكي ماينن اوز به اوز اولماسي

 

 

 باغرينا باسدي اونو بير جان كيمي

ساندي دردين، دردينه درمان كيمي

 اؤپدو آلنين شوقيلن بيرده الين

توتدو سئيريندن خبر بيرده يئرين

٩٥ گنجه چاتديردي دئدي آخير دؤزوم

باشدا گل اگلش سنه قوربان اؤزوم

 گئتدي سنلن سؤيله دي مندن حرج

صبرينن تاپديم بلي آخير فرج

 آچيلار سنلن بيزه مين بير دويون

قيش اولار ياز بيزلره، ياس توي دويون

 قورتارانسان پالچيغا باتسا نادان

وار اوره كده هر نه، سن سن آنلادان

 مرحبا اي موجتبي اي موصطفا

بيزلره وئرمز امان سن سيز قضا

١٠٠ اي منه مولا، اوزوم سنلن گولر   

كيم سنه اوغراشماسا آخير اؤلر

 

Advertisements

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: