معجزه حضرت ابوالفضل – شعر ترکی

بسم الله الرحمن الرحيم

معجزه حضرت ابوالفضل علیه السلام به طریق اشعار ترکی
—————————————————————-

ترک ایدیب طایر طبعیم قفس پیکریمی
گیتممیش امر ایلدی پهن ایلیم دفتریمی
دمبدم سسلیم امدادیمه ئوز دلبریمی
**************** منده تمکین ایلیوب حقه توکل ایدورم
**************** صدقیلن حضرت زهرایه توسل ایدورم
بو خبر کی قلمیم ثبت ایلیور دفترده
واعظ شرع نبی نقل ایلیوب منبرده
عین جریانی ده من نظم ایدورم بی پرده
**************** یادگاری قالا مندن توکه اود صبر ایوینه
**************** آپارام اجرینی فانوس کیمی قبر ایوینه
کیچمیش ایامیده قاجارلرون دورانی
بیر نفر شیعه اثنی عشری ایرانی
لکّه دن پاک و بری فطرتینون دامانی
**************** ساکن کوی ولا عاشق ربّ ازلی
**************** ریزه خوار کرم و سفره اولاد علی
بش یاشیندا واریدی بیر قیزی بیمار و نحیف
گونی گوندن اریوبدور بدنی اولدی ضعیف
درد جانکاهه ولی اولمادی بیچاره حریف
**************** فی المثل شام کیمی اولدی قرا ایامی
**************** شمع تک یاندی سو اولدی اریدی اندامی
گیجه لر یاتمادی گونوز ایلدی آه و نوا
جسمی تحلیله گیدوب میل ایلدی بس کی دوا
هیچ طبیبون او قیزا ویرمدی درمانی شفا
**************** ئورگین آتش حسرتده کباب ایلدیلر
**************** او قیزا شهرین اطباسی جواب ایلدیلر
بیر گیجه صبحه یوخون دوردی او قیز وقت اذان
گوزلرین اشکیله سرشار ایلدی ناله کنان
آتاسین ایتدی مخاطب دیدی ای روح روان
**************** منی آگاه ایلیون واردی اگر آیری خبر
**************** آنام ایوده گیجه گوندوز نَیه خاطر مَلیر
مطلبی روشن ایله یاخشی دگل قالسا نهان
نه دیوبدور سیزه پنهانی طبیبیم باباجان
هر نه اظهار ایلیوب سنده منه ایله بیان
**************** سوزی بی پرده دانیش خالق یکتایه گوره
**************** ناخوشام گویلومی آل حضرت زهرایه گوره
اولجاقین حضرت زهرا خانمون آدی بیان
قیزین آغوشه آلوبدور باباسی ناله کنان
دیدی دای آغلاما بسدی ایلدون قلبیمی قان
**************** لاله مثلی من ئوزوم دوزدی کی خونین جگرم
**************** طاقتون اولسا ولی مطلبی روشن دیرم
ایندی حضرت زهرا آدین اظهار ایلدون
فاطمه آدینه ویردون قسم اصرار ایلدون
ساخلا یادونده ئوزون سن منی وادار ایلدون
**************** واقعیت بودی بازار غمه واردی رواج
**************** گوئیا یوخدی قیزیم دردووه دنیاده علاج
ناامید اولما ولیکن بو ایشین آخرینه
آند ویر حضرت زهرانی چتین گونلرینه
یارالی سینه سینه باشده قرا معجرینه
**************** بلکه رحم ایلدی احوالوه سبحان جلیل
**************** اولموشام منده قیزیم قولسوز علمداره دخیل
الغرض صبحه کیمی ایلدیلر سوز و گداز
سویونوب قاره لباسین فلک شعبده باز
آتا نوباوه سینی ایتدی دعا وقت نماز
**************** آیریلار فصل خزاندا نجه بلبل گلدان
**************** تاپشیروبدور قیزین اللهه چیخوب منزلدن
گه گیدوب گه دایانوب شعله چکوردی نفسی
ناگهان رحمت حق اولدی اونون دادرسی
گوردی بو نوعی گلور قافله سالار سسی
**************** قویسا الله چیخاجاق قافله میز وقتِ پگاه
**************** کیمده واردور هوس کرب و بلا بسم الله
گوردی درمانده قالوب رحم ایلدی ذات حمید
مژده رحمت حق ویردی او نالانه نوید
اچیلوب ظلمت بختیده اونون صبح امید
**************** اللرین باشدان اوجالدوب ایلدی حمد و ثنا
**************** دیدی ای پادشه دادگر یوم جزا
آند ویرم سنی من کُرسی و لوح و قلمه
حضرت فاطمه نون چکدیگی آلام و غمه
علقم اوستونده یاتان قانه بویانمیش علمه
**************** دیمورم هیچ منه رحم ایله بو احساسه گوره
**************** بالاما ایله نظر حضرت عباسه گوره
سپری اولدی همان گون اچیلوب باب سحر
ایلیوب توشه مهیّا ایکی فرخنده سیر
کربلا مقصدینه باغلادیلار بار سفر
**************** سینه لرده دُر عشقیله دولوب جعبه عشق
**************** اولدیلار همسفر قافله کعبه عشق
قافله طی مسافت ایلیوب شام و سحر
بارور اولدی غرض نخل ریاضتده ثمر
کاروان مقصده چاتدی قوتاروب رنج سفر
**************** شهره بیر آز قالانی نور جلی گورسندی
**************** گوزلره قبر حسین ابن علی گورسندی
بو سوزوم گرچه دگل ذره اوزاق مطلبدن
با خبر ایستورم اولسون هامی تاب و تبدن
عشقی آرتوق اولان اشخاص اَنوب مرکبدن
**************** شوق یاریله دوشوب تپراقا یکسر بورونوب
**************** یوزی اوستونده حسین قبرینه ساری سورونوب
کعبه مرقد عشاقی مطاف ایلدیلر
آغلیوب قلبلرین گوهر صاف ایلدیلر
قبر شش گوشه مولانی طواف ایلدیلر

**************** آغلیوب سینه وروبلار گَله عرش اهلینه خوش
**************** اوخشیوبلار قوزی قربانی ربابون یری بوش
نجه کی نذر ایلمیشدی آتاسی پنهانی
ترک ایدیبلر حرم سید مظلومانی
قصد ایدیبلر حرم طیبه سقانی
**************** ال اله ویردی ایکی سالک فرخنده هدف
**************** حرکت ایلدیلر قبر علمداره طرف
عاقبت ایتدی تبسم اولارا چهره فال
باب سقایه طرف آچدی همالر پر و بال
یتیشوب صحن ابوالفضله ایکی نیک خصال
**************** قاپی آغزیندا دوروب ایلدیلر آه و نوا
**************** نچه تعلیم زیارت قیزینا ویردی آتا
صحن عباسیده آغوشه آلوب فرزندین
ئوپدی زیبا یوزینی دوتدی دیله دلبندین
بویننون آچدی اول خرداجا گردنبندین
**************** زلفینی هوردی معطر ایلدی چون گل یاس
**************** اگنینه صورا گیندیردی اونون قاره لباس
باشوه باغلا دیدی ایندی قرا معجرووی
آستانیندن ئوپوب توک یوزه اشک ترووی
اُسرا مثلی قیزیم سینووه قوی اللرووی
**************** نظرین جلب ایلمک ایندی قالوبدور ئوزووه
**************** بوردادی دردووه درمان بابا قربان گوزووه
الغرض داخل اولوبدور حرمه ناله کنان
آستانیندن ئوپوب اخذ ایلدی فیض جنان
طفل بیماری طبیبه ویریب اوّلده نشان
**************** باغلادی بوینونا بیر رشته مشکین اصیل
**************** حرم حضرت عباسه قیزین سالدی دخیل
چرخی دونسون فلکین اولمادی سیرینده اثر
سپری اولدی بو منو الیله چوخ شام و سحر
ویرمدی ناله سی بیچاره قیزین ذرّه ثمر
**************** قویمادی دست زمانه الی درمانه چاتا
**************** گون به گون گل کیمی پژمرده قیزین گوردی آتا
حرمی ترک ایلیوب بیر گونی اول مرد خدا
طفل بیماره تهیه ایلیه آب و غذا
ناگهان گوردی بو نوعی اوجالور عرشه صدا
**************** آی حسین زائری آماده اولون هجرانه
**************** قویسا الله قییدور قافله میز ایرانه
بو خبردن سیخیلوب قلبی دوشوب پیچ و خمه
غرق اولوب زورق اندیشه سی دریای غمه
الی قوینوندا سراسیمه قییتدی حرمه
**************** الدی آغوشینه دُردانه سین اول فرزانه
**************** صادقانه قیزین آگاه ایلدی جریانه
دیدی ای میوه قلبیم سنی زهرای بتول
قلبیمون باشی یانور اولما بو اندازه ملول
بو گیجه ایله فقط سختی هجرانی قبول
**************** کسیلوب چاره یولی من سنی ترک ایتملیَم
**************** قیزیم اللهه توکّل نجفه گیتملیَم
مطلبیم عفو ایلیون اولدی اگر طولانی
الغرض ترک ایلیوبدور حرم سقانی
گون باتان وقتی چیخوب قافله دن پنهانی
**************** قویمادی وقتی تلف سالک فرزانه اولا
**************** نجفه ساری مینوب مرکبینه دوشدی یولا
چوخ امیدیله گیدور محضر سلطانه طرف
ئورگیندن اوجالور شعله جانسوز اسف
آغلیا آغلیا ورد ایلیوب ای شاه نجف
**************** گلورم محضرووه چاره سیزم غرق محن
**************** دست خالی سنی زهرا منی قیتر میه سن
ناگهان گوردی اوزاقدن بورولوب خاک گلور
گِرد بادون آراسیندا یَلِ بی باک گلور
ایلیوب سینه صحرالری صد چاک گلور
**************** سرعتیلن یتیشوب مرکبینی ایلدی رام
**************** چوخ وقاریله توقف ایلیوب ویردی سلام
گوسترور خط مسیرون دیدی آیدین هدفی
قصد ایدبسن گورورم شوقیله شهر نجفی
شرفی اولسا کیمین یاده سالار با شرفی
**************** گون باتور یولدا اوزاقدی سنی آگاه ایدورم
**************** میلون اولسا سنیلن منده او شهره گیدورم
ولی اولّده منی باخبر ایله سوزووه
ندور علت کی دولوب اشک مصیبت گوزووه
گون باتان وقتی ویروبسن نیه زحمت ئوزووه
**************** هدفون منحصراً فیض زیارتدی اگر
**************** صبر ایلیدون آچیلیدی یوزووه باب سحر
احترامیله جوابینده او پاکیزه نَسَب
دیدی لطفون منه معلومیدی ای مرد عرب
ایلیوبدور بالامون دردی منی غرق تعب
**************** گیدورم دردیمی مولایه حکایت ایلیم
**************** بالاسیندن ئوزینه اوردا شکایت ایلیم
اشیدیب درد دلین آه چکوب مرد عرب
دیدی ای مرد صفا پیشه و شایسته نَسَب
خسته سن گیتمه نجف شهرینه بو نیمه شب
**************** صبر ایله ویردیگون اخباره ئوزوم باخبرم
**************** مژدگانی بویون آلسون سوزی روشن دیرم
گوزووین یاشینی سیل بسدی بو اندازه فغان
او نشانی کی قیزوندان ایلدون ایندی بیان
گوردوم عباس حرمینده اونی من خنده کنان
**************** قصدووه آگه اولوبدور پسر شیر خدا
**************** آغلیان گوزلرون آیدین بالوا ویردی شفا
ماجرانین اولیندن ایله اوردیدم ئوزوم
صحنیه شاهدیدیم واقعه نی گوردی گوزوم
گیت یوبانما ، سوزومه باورایله دوزدی سوزوم
**************** نازدانون سنی گوزلور داخی تأخیر ایلمه
**************** سنی الله اونی اینجییتمه قیت تز حرمه
دیدی معلوم اولونان قاصد رحمتسن اقا
گورورم صاحب اجلال و شرافتسن آقا
آقام عباس کیمی صاحب غیرتسن آقا
**************** ویردگون مژده اگر چه منه دنیایه دگَر
**************** الووی ویر الیمه قولیده صادق سن اگر
یا حسین کاش او آخر سوزوی ایتمدی بیان
تیتره دیب جسمینه باشدان ایاقا ویردی تکان
باخدی بیر ساق صولونا آغلادی بیردن اوجادان
**************** دیدی آیا نیه سن بو سوزی اظهار ایلدون
**************** آچورام مطلبی امّا منی سن خوار ایلدون
کیمی یاد ایلدون ایرانیده ای مرد عجم
یالواریدون آقا ناخوش بالاما ایله کرم
منه بیر باخ قلبون سینوب اوندان او منم
**************** کربلاده کسیلن ظلمینه قوللاری منم
**************** آقامون عرصه ده غیرتلی علمداری منم
سوزیمون اوسته قولوم اولدی قلم میداندا
دیرسگیم ساخلادی سینمده علم میداندا
دیزی اوسته باشیمی آلدی ننم میداندا
**************** دیدی عباس دانیش مشتریَم من سوزووه
**************** نیه بو حاله قالوبسان ننه قربان گوزووه
آخدوقیجا باشوین قانی هوروب گوز قاشوی
یارالی سینمه آهسته اوغول قوی باشوی
باشووین اوسته چاغیر اوغلی ئولن قارداشووی
**************** گلر امدادووه عشقی سنه چوخدی بالامون
**************** اصغری قالدی فقط هیچ کسی یوخدی بالامون

پایان ………
صراط عاشورا اثر حسین غفاری اردبیلی صفحه 216 -226