احسان اولسون – معجز شبستری

احسان اولسون

گويلومي ايسته سه هر كيمسه هراسان اولسون

اودا من تك گوروم آخيرده پريشان اولسون

مين گويول حسرت نانيله پريشان اولسا

قويمارام دلبريمين زلفي پريشان اولسون

هر كيم ايستير وطنيندن قاچا ديوانه كيمين

تا اولونجه قالا غربتده، مسلمان اولسون

مومن كامل ايديم بنده فراوانليغدا

كافر اولدوم،  بو گرك كي باهاليقدان اولسون

بوش يئره خلقه پلو وئرمه، منيم حقيمي وئر

شول الذمه ده دن ارواحينا احسان اولسون

گورورم شوقه گليبسن دالين ايستير حجمت

واقتي واردير، هله قوي ماه حزيران اولسون

گئده!، من زورايله خلقين يولوني كسمه ميشم

بوردا كئچمير عملي، عازم تهران اولسون

منه لازيمدي اوباشدانه پلو، شامه كباب

سنده سعي ائيله قازان، سفره ده شوربان اولسون

گرچه اون دانه يليم واردي ماهوت تره زري

حاجي سئومير دئيير از مخمل كاشان اولسون

موعدي كئچميش بولارين ايسته ميرم اي خياط

منه بير يل تيكه سن اگنيمه چسبان اولسون

لكن اما سنه بير يل تيكه رم تهراني

حاجي خوشلانسا گرك مزدي فراوان اولسون

بئله شئيلرده حاجي، كان سخاوتدي باجي

وئره جك ايسته ديگين هر نئچه تومان اولسون

فقط اما كاسيبا بير قره تنبل وئرمز

گرچه باشدان آياغا پيكري عريان اولسون

يوخسول همسايه سنين حاليني گورمور مطلق

بئله دولتلي گرك قانينا غلطان اولسون

((معجزين)) اولماسا افطاره كبابي- آشي

قورخورام خاچ ساليب بوينونا، آلمان اولسون

یازان:  شبسترلي معجز