آغاج دان سوروش + ناغیل

آغاجدان سوروش

مندن سوروشماكي، بوگون نه گوندور. من هاردان بيله‌جه‌يم كي، بو گون هانسي گوندور. سن مندن سوروش كي ساعات نئچه‌دي، من تئز دئيه‌رم نئچه‌دير. گرچي ياريم ساعات بوندان اؤنجه ساعاتي آچيب، هارا قويدوغومو بيلميرم …
مندن سوروشماكي دونن نه گونو ايدي يا سحر هانسي گون اولاجاقدير.
من هاردان بيله‌جه‌يم كي، سحر و او بيريسي گونون آدي نه‌دير، يا دونن سيراغا گونون آدين من هاردان بيله‌جه‌يم، من بيليرم كي سيراغا گون، همين گوندور كي ايرضا طوطيني آپارميشدير. آنجاق هارا آپارديغيني بيلميرم من گؤردوم كي، گئدير الينده قفس، قفسين ايچينده ايسه طوطي وار.
اوره‌يين ايسته‌ييرسه ايرضاني تاپ، اؤزوندن سوروش… من بونو بيليرم كي، دونن همين گوندور كي سارلار آغاجدان اوچوب گئتديلر. مندن او گونون آديني خبر آلما، مندن سوروشماكي، هارا گئتديلر. من يالنيز اونو بيليرم كي، سارلار آغاجلاري تك قويوب، ري خارابالاري‌نين اوستوندن كئچيب گئتديلر و بيرده تاپيلماديلار. ايسته‌ييرسنسه هارا و هانسي گون گئتديلر. اونو آغاجدان سوروش. يقين اوگونون آديني خاطيرلايا بيلر، بلكه ده دئيه‌ركي سارلاري هارا گئديب، نه اوچون گئديب و نه اوچون بيرده قاييتماميشلار …
مندن سوروشماكي، بوگون آيين نئچه‌سيدير، منكي بيلميرم ايندي هانسي آيدير، هاردان بيله‌‌جه‌يم آيين نئچه‌سيدير. سن مندن گؤيلرين (سبزيلرين) و مئيوه‌لرين آديني سؤروش كي، تئز دئييم بو اسفناج يا كرفسدير، او اوزومدور، يا آرموددور. من هر گون گؤي و مئيوه‌لرله باش قاتيرام. ممكن دئييل هر گون گؤردويوم شئيلرين آدلاريني بيلمه‌ييم … منه ائله گليركي، الهي بلالار و طبيعي حاديثه‌لر نتيجه سيلينسين … يعني بيلمه‌يك كي، هانسي زامانداييق بئله بير گون قاباغا گلسه، گؤره‌جكسينيز، دونيا نئجه بر بزه‌كلي شهره چئوريليبدير:
قاطارلار تونللرده، گميلر دنيزلرده طياره‌لر گؤيلرده اؤز چؤره‌لرينه فيريلداياجاقدير و بيلمه‌يه‌جك نئجه سمو ائله‌ميشلر … هدفه دوغرو وورولان ايون توپلاري همين هدفين (دروازه‌نين) اوستونده قورويوب قالاجاقديركي، اويون سئوه‌رلرده ده بللي اولسون:
اگر هورا چكمه‌لي اولسالار، تئزليكله اؤزلرين راحات ائله‌سينلر، اگر سؤزلري يئرسيز و پيس اولارسا اؤزلريني يوباتماسينلار …
ايندي دئيه‌جكسن: ديلسيز توپ هارا بو سؤزلر هارا؟ … آمما بيليرم كي، بئله بير گون قاباغا گلرسه، يعني زامان ايترسه، هئچ بير ساپ، اينه‌يه ساپلانماياجاقدير و اؤز دؤوربرينه او قدر فيرلاياجاقدير كي، هانسي گون و هانسي ساعاتي معلوم ائديلر. دوغرودوركي، بيلمك ايسته‌ينلر، بيليرلر. باش وئرن هر بير حاديثه اوچون ايلك باشدان ساعات و زامان تعين ائديلميشدير … ايندي زاماني ايتيرديكده، دئيه بيلمه‌يه‌جه‌ييك زامانين هاراسينداييق …
من بو مكتوبو بوش بوشونا باشلاماميشديم. آغاجلارين تورموجوقلاريندان، قارانقوشلارين گليشندن باشا دوشموشدوم كي، نوروز ياخينلاشماليدير … من بو مكتوبو نوروزون باشلانماسي اوچون باشلاميشديم. اينديكي بئله چيخدي و بئله اولدو، بئله ده دوام ائتديره‌جه‌يم.

یازان:  بهروز ايماني

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: