غیرت قانادینا
اربابلارين ائتديكلري جنايتين آغري- آجيسي هله‌ده اوره كلردن سيلينمه ييب. هر بير قوجادان بو باره‌ده بير سؤز خبر آلاندا يقين قيافه سينده بير دييشيك ليك علامتي گؤرونه جكدير و سؤز آراسي تئز- تئز دئيه جك كي، الله بيرده او گونلري دالي قايتارماسين. من بو باره‌ده چوخ سؤز آچماق ايسته ميرم. بو بارده ده ايندييه كيمي يوزلرجه فيلم تماشايا قويولوبدور. من اؤزوم بو حقده ((سومالي قاسم)) رمانيندا اربابلارين ظلموندن و اونلارين مبارزه ائدن قهرمانلاردان چوخ صحبت آچميشام. لاكن بو كئچيك حكايه‌ني نقل ائدن 70 ياشلي ((سيد)) مني آرتيق هيجانلانديريب و بو حقيقي داستاني قلمه آلماغا تشويق ائديبدير.
من بوگونه كيمي سيدي گؤرمه ميشديم، اما ياخين قوهوموموز ((آغا رضا)) اونون خير خواهليغيندان، وظيفه شناسليغيندان، اؤز ولايتي نين صاف فرهنگيني هميشه ديري ساخلاديغيندان و بونلارين هاميسيندان اهميتلي اونون دينه، مذهبه حدسيز، حدود سيز علاقه‌سيندن چوخ دانيشميشدي. دئمه لي بيزيم ((آغا رضا)) يا قرآني ا‌‌و‌يره‌دن ده ائله همين بو ((سيد)) ايدي.
بختين گتيرديگيندن اونو ياخيندان گؤرمك منه اوگون قسمت اولموشدو ماشينين ايچينده بيلمه‌ديم سؤز هاردان گلدي و نه دن دوشدو. آغا رضا اوندان خواهش ائتدي كي، قوچعلي نين ماجراسيني خلاصه ده اولسا بيزه دانيشسين. او، بير ساعته و بيرده ماشينين سرعتينه باخيب دئدي:
– اونون ماجراسي اوزون دور، وقت يئتيرمز، قوي قالسين سوراليغا. هئچ كس بو ماجرانين تعريف اولونماسي نين سورايا قالماسينا راضيليق وئرمه‌دي. ائله بونا گؤره ده او سؤزه باشلادي:
– دقيق ياديمدا دئييل،هانسي ايللر ايدي، هم كندلي لريميزين بيري ايله تهراندا ايشله ييرديك. جوان وقتيميزايدي- نه ايشله‌مكدن دويوردوق، نه ده گزيب، دولانماقدان.
منيم يولداشم تهرانا احتياج اوچون يوخ، بلكه آتاسي نين اليندن قويوب قاچميشدي. گويا آتاسي اونون راضليغيني نظره آلمادان اؤز قوهوملاريندان اونا بير قيز آداخلاميشدي.
اودا ائله بونا گؤره غربت ولايتينه كؤچموشدو. آتاسي سور اقلاشيب اونو تاپاندان سونرا، منه دئدي: اوغلوم مندن بتر كوسوب، اونو بير جور ديله توت، بلكه اؤزومله گؤتوروم آپاريم. ائله ده اولدو و اوغلاني دا گئتمه يه راضي سالديق. دوستوم آتاسيندان خواهش ائله‌دي‌كي، اؤزونون باكي سفريندن و اوردا قوچعلي ايله نئجه تانيش اولدوغوندان بير آز دانيشسين: بيلميرم، قوجا، اوغلو ايله باريشديغينا گؤره ايدي و يا قوچعلي نين مردانه ليگيندن ايدي بيردن- بيره بئله قيزغين صحبته باشلادي. او دئدي: گونلرين بير گونو من ده بير چوخلاري كيمي بير تيكه چؤره‌ك قازانماق اوچون باكييا گئتمه‌لي اولدوم. اورا يئتيشديم گؤردوم باكي نين وضعيتي ائله ده كي اونون باره‌سينده ائشيتميشديم دئييل.
گئده‌نلرين و يا همين منطقه ساكنلري نين اكثريتي ايشسيزليكدن جانا گليبلر و ايشله‌ين لرده لاپ فلاكت ايچينده چؤره‌ك قازانيرلار، منه ائله گليركي، معروف آتالار سؤزو ((چؤره‌ك داشدان چيخير)) مثلي بو وضعيتدن يارانيبدير. ايشسيزليك دردي قالسين بير طرفده، مني بو گونلر لاپ داريحديران و اوره ييمي آجي عذابلارا سالان مسئله، گونده نفت قويولاريندا اونلارجا انسانين هلاك اولماسي ايدي.
من ده بير چوخلاري كيمي بير نئچه گون ايشسيز قالديم، آخردا بير الله بنده‌سي منه دئدي كي، گل خيابان قيراغيندا اوتور سيميشقا سات.
همين گوندن سيميشقا ساتماغا باشلاديم. بازاريم ائله توتموشدوكي ، گل گؤره‌سن بير مدت ايشله‌يندن سونرا، بير نفرين واسطه‌سي ايله اكينچيليك ايشينه قوشولدوم. منيم اربابيم او آداملاردان دئييلدي كي، مني چوخ ايشله‌ديب، آز پول وئرسين. هله اونون مثبت خصوصيتلريندن ساييليردي. من ده لاپ اؤز ايشيم كيمي ايشله ييرديم. او هر سؤز باشي منه دئييردي كي، سن منيم ايشچيم يوخ، بلكه شريكيمسن: من سني بويئرلردن هئچ وقت آييرماياجاغام. دقيق ياديمدادير كي، بيزيم يئرين ياخينليغيندا ياشي كئچميش بير قوچعلي عمي واريدي. او گونلريني چوخ وقت اؤز عالمينده كئچيره‌ردي. بعضا او ائله فكره گئده‌ردي كي، اونوتوپ- تفنگ سسي ايله ده فكريندن آييرماق اولمازدي. قوچعلي نين اؤزونه مخصوص خصوصيتي مني آرتيق جذب ائديردي. مني هر شئيدن آرتيق هوسلنديره‌ن مسئله اونون آلنينداكي بارماق درينگيينده بير چاپيق ايدي. بارماق درينلييينده دئيه‌نده او معنادا دئييل، كي، بارماق افقي حالتده چاپيغين ايچينده گيزلنه بيلردي. بلكه نظره ائله گليرديكي بارماق مايل و يا عمودي حالتده چوخورلوقدا گيزلنه بيلر.
گونلرين بيرينده قوچعلي عمي‌نين كئفي بتر سازايدي، او وقت فرصتدن استفاده ائديب، چاپيغين سببيني اوندان سوروشدوم او بير منه وبير اطرافا باخيب دريندن بير آه چكه- چكه دئدي:
– اونون سنه نه فايداسي وار، گل منيم اكينچيليك تجربه لريمدن سوروش.
من ده بيلديگيم قدر سنه دانيشيم. منيم سواليمدان بير آز ناراضي اولدوغو حالدا آغزيني بوزوب، درين فكره گئتدي. لاكن وئرديگيم سوالين اوستوندن و از كئچمه جه ييمي گؤره‌ن كيمي دئدي:
– اينديكي بئله اولدو، گئت آغاج خير داسيندان و يا اودون تكه‌لريندن بير اود ياندير و قارا چايداني دا قوي اونون اوستونده قايناسين. چاي حاضر اولاندان سونرا مني- چاغير، گليم سنه اؤز باشيمدان كئچنلردن دانيشيم. قوچعلي عمي‌نين بو سؤزوندن من چوخ سئوينديم. لاپ اوشاقلار كيمي آتيليپ، دوشمك ايسته‌ديم. بئش دقيقه نين عرضينده اوديانديريب، سوگتيريب چاي دمله‌يندن سونرا، قوچعلي عمي‌نين يانينا آپارديم. آخار بير سو كناريندا اوتوردوق. قوچعلي عمي بير استان چاي ايچندن سونرا پاپريزيني يانديريب، ياواش- ياواش سؤزه باشلادي:
– هه اوغلوم بو چرخي دؤنموش اربابلار، خانلار، بگلر نه قدركي، رعيته آغاليق ائدير، بير او قدرده رعيتين، فهله نين بير سؤزله بوتون كاسب كوسوبون ايشي دالي دوشور. اؤزوده گئجه- گوندوز ناراحتليق، ازيلمك، دؤيولمك و… بو كيمي شئيلردن ياخا قورتارا بيلمه يه جكدير. آدام والله بو باره ده هئچ يئرده دانيشا بيلمير، چونكي حكومتين سؤزودور و اونلارين سؤزوده حكومتين. ياخشي بير- بيرلريني تاپيبلار بللي دير اونلار حكومتي، حكومت ده اونلاري ساخلاييب. اما قارداش اوغلو آتالار ناحق يئره دئمه ييبلر كي، ((هئچ كسين چراغي سحره كيمي يانماز!)) و يا (( اوزگه سينه قويوقازان، اؤزو دوشر ايچينه!)) بلي بو ائل آتالاري هم ده ياخشي دئييبلر كي، (( گئده‌ر بو گؤزه لليك سنه ده قالماز!)) اونلار بو حكمت آميز سؤزلري ايله ظلمون قاباغيندا دايانيب، ظالملرين بئش گونلوك آت چاپديريب، باش كسيب، اسرار آميز فقير لرده ياشاماغي نين عاقبتي نين اولماسيني قاباقجادان بيلديريبلر.
بيزيم ((سو مقاييت)) محاليندا ((مرتض خان)) آديندا بير ارباب وارايدي. بو آدام جماعتي اينجيديب، دؤيه- دؤيه اونلارين حقلريني اللريندن آلماق ايله قانع اولموردو ويئري دوشنده هر بير چيركين عمله ال آتيردي.
او آچيق- آشكارا اؤزگه نين ناموسونو لكه له ييردي و هئچ كس ده اونا ((گؤزون اوسته قاشين وار)) دا دئيه بيلميردي. منيم اوره‌ييمي اويان، وجودومو يانديران مسئله‌سي‌ايدي. بعضي وقتلر اؤز- اؤزومه دئييرديم: بو مرتضي خان منيم ناموسوما كج باخسا، من او زمان نه ائله‌يه بيله‌رم؟ نه گوجوم، گوجونه چاتير، نه ده كي، سؤزوم سؤزونه باتير. يا گرك بير چوخلاري كيمي اؤزومو بيلمه مزليگه ووروب عارسيز- عارسيز ياشاييم، يادا ((هر درده دؤزمك اولار آنجاق ناموسون لكه لنمه سينه دؤزمك اولماز))- دئيه اؤزومو بو دنيادان خلاص ائديم.
يوخ نامردين قاباغيندا اؤلمك كيشي ليكدن دئييل- دئيه اؤز- اؤزومه باغيريرديم.
هميشه وهر يئرده بونو دئيه‌رم كي، ((الله عقله سيغمايان ايشي، آدامين باشينا گتيرمه‌سين)) من اينانميرديم بير گون بو ايشلرين بيري منيم اؤز باشيما گله‌جكدير. آخي بيرده مرتضي خان منيم دؤزومسوزلويومو، ايتي تيكانلي اولدوغومو، بير سؤزله حرصلي اولاندا هئچ بير شئيدن قورخماديغيمي ياخشي باشا دوشوردو. قاباقلاردا بير نئچه دفعه سؤزوموز چيخميشدي و اونون گؤزونون اودونو اوشاقليق زمانيندان آلميشديم. اونا گؤره منه چوخ ياخينلاشمازدي. ياخينلاشاندا دا چاليشاردي كي، قويروغومو آياقلاماسين. من اؤزوم ده چاليشارديم كي، اونا توخونان بير سؤزو دانيشماييم. اونا گؤره كي، باش قووزاسايديم، باشيمي ازه‌رديلر. اؤزومه ده ائله بير توي توتارديلار كي گل گؤره‌سن. مرتضي خانين گونو- گوندن جنايتي و خوشا گلمز ايشلري گئتديكجه چوخاليردي. من آيري بير كنده كؤچمك فكرينده‌ايديم كي بيردن كيچيك باجيم الي اوزونده آغلايا- آغلايا قاپيدان گيريب، اوره‌ك يانديريجي بير طرزده باشيني سينه‌مه سؤيكه‌يه رك هونكور- هونكور آغلاماغا باشلادي. منيم ده هئچ شئيدن خبريم يوخ‌ايدي. بيلميرديم كي، اونو كيم دؤيوب، كيم ايله ساواشيب، آغلاماقدان سؤزومه جواب وئره بيلميردي. اوتانديغيندان دا اليني اوزوندن چكه بيلميردي. نهايت چتينليكله اللريني اوزوندن آييرا بيلديم. اونون اوزونده بير وحشي حيوانين ديش يئرلريني گؤردوكده قان بئينيمه دولاشدي و مسئله‌نين نه يئرده اولدوغونو باشا دوشدوم. تئز آياغا قالخيب، غضبلي حالدا مرتضي خان قاچما گلديم- دئيه باشي آلولو حالدا قاچماغا باشلاديم.
ياري يولدا كندين دونيا گورموش آغ ساققالي مني باشاساليب، بير ته هر دالي قايتاردي. من بو جنايتين قاباغيندا بير ساعتده دايانا بيلمزديم. لاكن ذهنيمه گلن بير فكر منيم قلبيم اوچون بؤيوك بير داياق اولدو. همين گون باجي- قارداشلاريمي آپاريب قونشو كندده ياشان بير قوهوموموز گيلده قويدوم. اؤزوم ده آت ايله قاييديب باكيدا منيم مهربان، اوره‌يي آچيق بير خالام وارايدي، خالامين اري ده پليس اداره سينده افسرايدي. من نه اوچون باكييا گلديم،خالامين ارينه بيلديرديم. اما او منه نه هه، نه ده يوخ دئدي. بير ته هر مسئله‌نين اوستوندن سوووشدو. بير نئجه ساعتدن سونرا گئجه كئشيگينه گئده جك ايدي. او اداره‌يه گئدنده خالاما دئميشدي كي، قوچعليني بيرته هر راضي سال، اؤزوده نه قدر پول ايسته‌سه وئر گئتسين.
خالام اري اداره‌يه گئدندن سونرا ، سانديغيني آچيب، و اوردان تزه بير سلاح چيخارتدي. من ايندييه كيمي اليمه تفنگ آلماميشديم، خالام گئجه سحره كيمي گولله آتماغي و اونون نئجه آچيليب قوشولماسيني، آتيشما زماني دشمندن نئجه گيزلنمه يي و دئمك اولار تفنگين بوتون رمزلريني منه اؤيره دندن سونرا، او وقتين پولومنه نئچه مانات، همچنين اؤزونون قيمتلي بيلرزيگيني چيخاريب منه وئردي و دئدي: هارا گيره دوشدون مني خبر ائله، اما دشمني راحت ائتمه‌ميش بير لحظه ده اوتورما! بونو دئييب بير- بيريميزدن آيريلديق.
گونشين حرارتي گئتديكجه آزاليردي، يايين امانسيز ايستيسيندن جانا گلميش خرمنچي لر راحت نفس چكمه‌يه وقت تاپميشديلار. بيري ماللاريني قيراغا ووروب، قان ترين ايچينده استكان- استكان چاي ايچمه كله مشغول ايدي. بيري كؤلگنديريك آلتيندا راحت اگله‌شره‌ك سيگاريني سوموروردو.
بيريسي تله‌سيك حالداماللاري كولش اوستونده تئز- تئز اوطرف بو طرفه قوووردو كي، گون اييلمه ميش بلكه ايشيني آخيرا چاتديرسين، مرتضي خانين خرمن ليگي كند خرمن لريندن آرالي، چايين اوتاييندا بوشلاييب، بير نئچه طرفدن خانين محصولونو دؤيور دولر. مرتضي خان اورتا كولشين اوستونده ((وله)) مينيب، اؤكوزلرين له‌له‌مه‌سيني گؤرمه‌دن اوخويا- اوخويا ولين اوستونده اوطرف بو طرفه گئديردي. علتي هئچ كيمسه‌يه معلوم اولمايان خانين بيردن- بيره شاققاناق چكيب، گولمه‌سي خرمنچي لرين‌هاي- كويونه قاريشيب، ايتيردي. خان بير نئچه ساعت بوندان قاباق بولاقدان ايري سهنگ آپاران كيچيك ياشلي قيزين دالينا دوشوب، اونا ياخينلاشماق ايسته ينده قيز، قور خودان سهنگي يئره آتيب، قاچديغيني يادينا سالاراق بيردن- بيره اوجادان گولمه‌گه باشلادي. گولمكدن اوغونا خان گاه او اؤكوزون او استونه و گاه دا بو اؤكوزون اوستونه آغناييردي قديني دوزلديب تنبل- تنبل گولن خانين قاشقاسينا ده‌ين گولله خرمنچي لرين هاي- كويونون بيردن- بيره ياتماسينا سبب اولدو. خرمنليگه ائله بير سكوت چؤكدوكي، گل گؤره‌سن- ائله بيل قورباغا گؤلونه ايري داش سالدين.
قوچعلي مرتضي خاني اؤلدوره‌ندن سونرا قميشليكدن سوزوله- سوزوله اكيليب ياخين كندلرين بيرينده گيزلنيب قالدي.
اربابي نين اؤلوموندن قورخويا دوشن مباشر بيلميردي نئيله‌سين گاه كولش اوستونو آل قاني ايله بويايان مرتضي خانين نعشينه باخيب، باشيني توولاييردي، گاه خانين فلاكتله جان وئرديگيندن سئوينن كندليلره مراجعه ائده‌رك، ((بوندان سونرا گؤرون سيزه نئچه‌يه باخار.))- دئيه بوغولوب آچيليردي. كندليلر مرتضي خانين اؤلوموندن شاد اولسالاردا آرتيق قورخوردولار. ائله بيل اونلار بيليرديلر كي، بو ساعت دؤلت مامورلاري تؤكولوب، كندي چاپيپ تالاياندان سونرا هاميني حبسه سالاجاقلار. اما ايش، كندليلر فكرلشديگي كيمي بيتمه‌دي.
چونكي مرتضي خان قوچعلي نين الي ايله هلاك اولموش دئيه باش فرمانده مامورلارينا امر ائتدي كي، تئزليكله قوچعلي توتوب گتيرسينلر.
منطقه بير- بيرينه قاريشميشدي، دولت مامورلاري هر طرفدن قوچعليني آختارماغا باشلاسالاردا بير ايش گؤره بيلمه‌ديلر.
قوچعلي بير مدت او كندن- بو كنده، بو كندن او كنده كئچيب، مامورلارا توتوق وئرمه‌دي. نهايت تصميميني توتوب، تفليسه يوللاندي، تفليسده آذربايجانلي چوخ اولسادا، ياشاييش اونا چوخ چتين ايدي باشي نين اولوب، كئچميشيندن دانيشان قوچعلي دريندن بير آه چكيب، ياريم ساعتدن چوخ يئرده قاليب، سويويان چاييني ايچمك ايسته ديكده، دئديم كي، قوچعلي عمي قوي دوروم چايي قيزديريم آنجاق سني الله حوصله‌دن گئديب، دئيه اوجاغي تزه‌دن ياغديرماغاگئتديم چايداني قيزديريب گتيره‌نده قوچعلي عمي دئدي بو صحبتي قوي قالسين سونرايا، بير گون يئري گلر قالانيني تعريفله‌رم. قوچعلي عمي‌نين بو تئزليكده حوصله‌دن گئتمه سينه ناراحت اولسام دا سؤزو بيرده چئويرمه يه اوتانديم… بيردن بيره سوسماغيمي گؤره‌ن قوچعلي عمي چاييني ايچه- ايچه:
– آي اوغول سن نه ديمه دوشرسن، هله باخ گؤر آخري نه اولور. بيرده مندن بو راحتليغا ال چكيرسن، هر حالدا سحره كيمي اولسادا اوتوروب باشيمين احوالاتيني سؤيله يه جگم، سنه شوخلوق ائله ييرديم، هم ده چوخدان اوره‌ييم ايسته ييردي كي، چكديگيم دردلري، ييغيب ساخلاديغيم غملري بيرينه دانيشيم، بلكه بير آز يونگوله‌شيم دئيه تزه‌دن سؤزه باشلادي.
هه اوغول تفليسده باشيم داشدان- داشا دگدي، گون اولور دو كي، گئجه‌لري آج ياتيرديم. بيلميرم اليمه هاردان بير- ايكي تومن پول دوشدو كي، تئز قاچيريب بير- ايكي چؤره‌ك آلديم. قهوه‌خانا ده اوتوروب اشتها ايله يئمه گه مشغول ايديم. تفليس- ين ((شيطان بازاري)) ياخينليغيندا يئرلشن. بازار ياخين اولدوغو اوچون هميشه شولوق اولاردي. اونا گؤره آغيز دئيه‌ني قولاق ائشيتميردي. سن دئمه بو شولوقلوغا باخماياراق قهوه‌چي نين سونرا گؤزو منده‌ايميش. باشيم يئمكدن آچيلاندان سونرا گؤردوم بو كيشي بير لحظه‌ده اولسون مندن يان اولمور. بونا گؤره بير آز تشويشه دوشوب، دئديم ((اولمايا بو كيشي مني تانييير)) بونو دئيب، اوردان بير تهر چيخماق ايسته ديكده قهوه‌چي منيم بيكار اولوب- اولماديغي سوروشدو. بيلدي كي، منيم اليمده ايشيم يوخدور. تئز دئدي كي، سحر گل بوردا منه كؤمك ائله، سنه بير شئي وئره‌ريك. من((باش اوسته گلرم))- قهوه خانادن چيخديم.
ايش تاپديغيم اوچون گئجه يوخوم آپارميردي. بيليرديم كي، بوندان سونرا آج قالمايا جاغام، هله اوسته ليك باجيلاريمادا كؤمك ائده جگم. اوگونون سحريسي ايشه باشلاديم، قهوه خاناني ياخشي اداره ائتديگيم اوچون استاديم منه آرتيق مزد وئريردي. نه باشيزي آغريديم آز مدت چكمه‌دي، بير آز ال- آياق ائله ييب، جاده قيراغيندا كيچيك بير قهوه خانا آچديم. قهوه خانا نين موقعيتي ياخشي اولسادا تزه آچيلديغي اوچون بير- ايكي گون گلن اولمادي. گؤرودون سماوري آليشديريب، چايي دمله‌يندن سونرا، اوتوروب مشتري گؤزلمكدن يامان داريخيرديم. هر دن اؤزومه داياق وئريب، مخصوص لحن ايله آي قهوه‌چي قارداش تئز اؤل تله‌سيرم منه بير چاي گتير- دئيه آياغا قالخيب، بير چاي تؤكوب غرورلا ايچيرديم يئنه بير آز گؤزله ييب گؤردوم كي، مشتري گلمه‌دي. گئنه اؤزوم اؤزومه امر ائديب چاي تؤكوب ايچيرديم. همين گونلرين بيرينده قوه‌خانايه ايكي نفر داخل اولدو. اونلارين قاباغينا چايي قويا- قويا اؤز اؤزومه: ((اولمايا بونلار مني توتماغا گليب؟)) دئيه جاپي ميز اوسته قوياندان سونرا سماورين دالينا كئچيب، آتدان- آتدان اونلاري سوزمه گه باشلاديم. مشتريلر چايلاريني آرخايينليقلا ايچندن سونرا جيبلريندن بير عكس چيخاريب)) آي كيشي گل گؤر بو عكسين صاحيبيني تانيييرسان يا يوخ))- دئيه مني چاغيرديلار. من عكسي گؤره‌نده مسئله‌نين نه اولدوغونو آچيق- آشكارا باشا دوشدوم. هر شئي آيدين ايدي. اونا گؤره قاييديب دئديم: نييه تانيميرام. بو منيم عكسيم دير. سيزده نه گزير. مشتريلر بير چوخ گولندن سونرا آشاغي طرفدن اگله‌شن مامور: قوچعلي سنين بو مردانه‌ليك خصوصيتين بيزيم ال- قولوموزو سست ائتدي بيز سني توتماديق.سن ده سعي ائله بوردا قالما، حيفسن توتوب اؤلدورره‌لر- دئيه يولداشيني آياغا قالخيزيب، چيخيب گئتديم روسيه‌يه، روسيه ده فحله‌ليك ائله‌ييرديم بير گون ايشدن قاييديب، خيابانين كناريندا ناهارا مشغول ايكن بيريسي قولومدان ياپيشيب: آي فلاني گل بورا گؤيده آختارديغيميزي يئرده گيره سالميشيق، من اونا بير تپيك ووروب، قويدوم قاچديم، مامورلار سئل كيمي منيم داليمجا تؤكولدولر. بير تهراؤزومو شهردن قيراغا چكديم، سحره كيمي مامورلار نه قده‌ر چاليشديلار مني نه توتا بيلديلر نه ده…
مامورلار مني توتماقدان اميدلريني تماميله اوزموشدولر، بير- ايكي ساعت گيزله‌نيب، قالاندان سونرا باشيمي قووزاديم كي گؤروم مامورلار وار، يا يوخ بير وقت آييلديم گؤردوم كي، مريض خانه‌ده‌يم. هه اوغلوم بو چاپيق كي، گؤروسن ائله همين چاپيقدي من دئديم: قوچعلي عمي دئي گؤروم سونرا نه اولدو؟
نه اوجاق عومرومو زنداندا چورودوب، قويماديم ناموس لكه‌سي اوستومده قالا… من قوچعلي عمي ايله آيريلاندا گون ده تزه- تزه چيخماغا باشلاييردي.
یازان: بهروز ايماني
Advertisements
Filed under: ناغیل و حیکایه,آذربایجان ادبیاتی Azərbaycan ədəbiyati | Tagged: ناغیل,ناغیل و حیکایه,آذربایجان ناغیللاری,اذری ناغیل,بهروز ایمانی,تورکی ناغیل,تورکجه داستان,غیرت قانادی |
Bir cavab yazın