بیر قیزا وورولدوم – تورکی شعر

بیر قیزا وورولدوم

بیر قیزا وورولدوم، اوزون گورمه دیم

گؤزونه باخمادیم، ساچین هورمه دیم.

او مندن جان آلدی، منسه اؤلمه دیم

ایندی چوخ زاماندیر اوندان خبر یوخ

اورگیمده واردیر اونا ، سؤزوم چوخ

هر گئجه رویامدا، هر گون فیکریمده

هر ساعات اؤنومده ، هر آن قلبیمده

او بیر تانریچا، منسه بیر بنده

تانریلار ، بنده یه وئرسلر جزا

بو تانری وئریبدیر منه چوخ جفا

مکتوبلار یازمیشام، جواب وئرمییب.

نئچه باش یالوارمیشام، حساب ائتمییب.

بیلمیرم او مندن کوسوب، کوسمییب.

کوسنلر کوسولو قالیب سالاردا

بو کوسن کوسمک له آلیشیب داها

سلام وئرنده سلام آلماییر

اللهین سلامی، جواب آلماییر

قوردوغوم تئله ده بیر آن قالماییر

صیاد دوروب ، تئله اوسته آغلاییر

جیران قاچیب، اوزاقاردا اوتلاییر

ایندی بیر من قالمیشام ، بیرده سؤزلریم

من اونو هر گئجه یئنه گؤزلریم

یوخوسوز قالسادا،آلا گوزلریم

گوزلریم گوزلریم منه دایاق اول

هر یانیم یاتمیشسا ، باری اویاق اول

«یار گلر آستا آستا

الده چیچک دسته دسته

گلیب کئچر منی گورمز

گئدیم دوروم یولو اوسته»