گئتمک ايسته ييرسن
گئتمک ایسته ییرسن،
بهانه سیز گئت،
اویاتما مورگولو خاطیره لری،
سسین همین سس دیر،
باخیشین اؤگئی،
گئدیرسن،
سسین ده یاد اولسون باری…
سن دنیز قوینونا آتیلمیش چیچک،
اوستونه دالغالار آتیلاجاقدیر.
ساختا محبتین
ساختا سند تک
نه واختسا اوستونده توتولاجاقدیر.
دؤشه نیب یوللار تک آیاقلارینا
سنه یالواریم می…
بو مومکون دئییل!
قویمارام قلبیم تک ووقاریم سینا
آلچالیب یاشاماق عؤمور – گون دئییل.
دئمیرم سن اوجا بیر داغسان، اییل،
دئمیرم قالیبدیر علاجیم سنه.
نه سنده محبت قارا پول دئییل،
نه من دیلنچییم ال آچیم سنه…
گئتمک ایسته ییرسن…
او یول، او دا سن…
بیر جوت گؤز باخاجاق آرخانجا سنین.
گئتدین می…
نه واختسا دؤنمک ایسته سن
تیکانلی یاستیغا دؤنه جک یئرین.
گئتمک ایسته ییرسن….
نه دانیش، نه دین!
یوخ اول اوزاقلار تک دوماندا ، چنده…
نه ییمی سئومیشدین؟
دئییه بیلمه دین،
ایندی یوز عییب گؤزوزسن منده.
گئتمک ایسته ییرسن،
بهانه سیز گئت،
اویاتما مورگولو خاطیره لری.
سسین همین سس دیر،
باخیشین اؤگئی،
گئدیرسن،
سسین ده یاد اولسون باری
Filed under: نصرت کسمنلی,تورکی شعرلر Türkcə şeirlər | Tagged: نصرت کسمنلی,نصرت کسمنلی نین شعرلری,نصرت کسه منلی,گئتمک ایسته ییرسن بهانه سیز گئت,گئتمک ایسته ییرسن بهانه سیز گد,گتمک ایستییرسن بهانه سیز گت,اشعار نصرت کسمنلی,تورکی شعر,شاعر آذربایجان,شعرهای نصرت کسمنلی |
[…] گئتمک ایسته ییرسن بهانه سیز گئت – نصرت کسمنلی […]