آذر 21 خاطیره سینه تبریز 1328 تورکی شعر

دوزلو اوغلان وبلاگلارینین یاخشی اولماقی اوچون آتیل باتیل فروشگاهین دان آلیش وئریش ائدین

ییرمی بیر  21آذر خاطيره سينه- تبريز ۱۳۲۸

*خـــاطـيـــره*
بو اوجا داغلارين قارلي باشيندا
هر بير قاياسيندا، هر بير داشيندا،
شاعيرلرين ايلهام خزينه سي وار.
بؤيوك عوصيانلارين خاطيره سي وار.
***

ائ عزيز وطنيم، اي بؤيوك دييار،
يئري وار آدينلا ائتسم ايفتيخار.
شرقين شرفيسن، شؤهرتيسن سن
آسلانلار يوردوسان قورولان گوندن.
سن يئني حياتين يارادانيسان
شرق تاريخينين قهرمانيسان.
سندن ايلهام آلير بؤيوك دويغولار
درين معناليدير، سنده هر نه وار.
سنين بو عوصيانكار طبيعتينده،
هر توتقونلوغوندا، هر بئهجتينده،
سنين بورانيندا، سنين قاريندا
سنين باهار آچان شن باهاريندا،
ياشيل دوزلرينده، اوولاقلاريندا،
چاي چمنلي گؤزل يايلاقلاريندا
سيزيلداييب اسن سرين يئلينده،
ايگيت ائللرينده، شيرين ديلينده،
اوجا داغلارينيين قارلي باشيندا،
هر بير قاياسيندا، هر بير داشيندا،
شاعيرلرين ايلهام خزينه سي وار،
بؤيوك عوصيانلارين خاطيره سي وار.
«دريالار ميرككب، مئشه لر قلم»
من كي، كئچميشيني يازا بيلمه رم.
كئچميشي قوي يازسين آنجاق تاريخلر
هر «عاشيق» دونيادا گؤردويون سؤيلر.
منجه ميللتيمين « آذر عوصياني »
كوتله لر عوصياني، ائللر عوصياني
شرف اولدوزودور سنين ياخانا
ايفتيخار آدينا، اي بؤيوك آنا
***
ييرمىدؤردونجو ايلين پاييز چاغيندا
بو اوجا داغلارين بوز قوجاغيندا
آذرلر يوردونون مرد اوغلانلاري
خلقيمين شرفلي قهرمانلاري
آزادليق بايراغين يئره وورموشدو
غاصيبلره قارشي دؤوران قورموشدو.
***
او گون حاققي ايتميش محكوم ائللره،
زنجيرلي قوللارا، باغلي ديللره،
بوردان اوجاليردي آزادليق سسي
قورتولوش نغمه سي، حيات نغمه سي.
يوخسول اكينچيلر، حاقسيز فهله لر،
محروم ضيياليلار، محكوم كوتله لر،
بو سسي دينله ييب، هره بير ياندان
نه تك آذربايجان، بوتون ايراندان
توفنگ گؤتوروردو، سيلاح تاخيردي،
سئل كيمي هر ياندان بورا آخيردي.
***
خالقين عوصيان سسي قالخيب اوجالدي
ياغينين جانينا ولوله سالدي.
نهايت، آذرين ايگيرمي بيرينده
دوشمان تسليم اولدو اؤز سنگرينده.
دؤندو غاصيبلرين قارا دؤوراني
خالقين ايراده سي ييخدي زينداني.
گولدو حياتيميز، گولدو ائليميز،
بولبول تك آچيلدي شيرين ديليميز.
***
آچيلدي سحر تك شاعيرين قلبي
ساحيلسيز دنيز تك سئوينجي داشدي.
گؤروب چيچكله نن شن حياتيني
مين اثر ياراتدي، مين نغمه قوشدو.
خيالي قوش كيمي قانادلاناراق
اوجالدي گؤيلرين نهايه سينه
يازدي ائللرينين ظفر نغمه سين
سحر بولودونون آغ سينه سينه.
***

يئنه بير ده اود پارلادي
آذرلرين اوجاغيندان
قارانليقلار كؤچون چاغدي
آذربايجان تورپاغيندان
اوفوقداكي قيزيل گونش
ايشيغيني ساچدي بيزه
يئني حيات باغيشلادي
آزاد اولموش نسليميزه.
گونش چيخدي، اتكله ندي
ظولمتلري چكدي دارا.
گؤيلرده كي بوز چوخالي
بولوتلاري يارا يارا.
گول اوزلو بير باهار دوغدو
قيشين قارلي سينه سيندن
داغلار گولدو، باغ اوينادي
آزاد حيات نغمه سيندن.
قوي ياييلسين قوجا شرقه
بو چوو، بو سس باشدان باشا
بيز سيتمكئش خالقلاري
چاغيريريق قورتولوشا.
گلين ائللر ال بير اولاق
ووراق، ييخاق غصبكاري
قودوز ديشلي ايشغالچيدان
تميزله يك هر ديياري.
برباد ائده ك يئر اوزوندن،
بايقوشلارين يوواسيني
ساهمانلاياق سعادتين
قارداشليغين دونياسيني.
***

بو سس گورلاديقجا بير شيمشك كيمي
ووروب تيتره ديردي ظولمون بيناسين.
اونون حيددتيندن گورلايان اودلار
ياخيردي شاهلارين كؤهنه دونياسين.
ياخيب يانديريردي، برباد ائديردي
قاري شئيطانلارين آبيده سيني.
كسيردي ائللره افسون اوخويان
آلچاق كلك بازين مشوم سسيني.
يوخسا دوشمانلاردا دويوردو بونو
بو سسده توپلانان بؤيوك قودرتي
ـ « بوتون آسياني توتاجاق بو سس »
او كي، گؤرنمزدي بو «فلاكتي»
هر ياندان اولاشدي بايقوشلار، ايتلر
سانكي كاييناتا دوشدو ولوله.
«گرکدير شرقده بوغولا بو سس»
دييه، ـ كؤهنه دونيا وئردي ال اله.
لوندوندا باشلادي گيزلي حركات
واشينگتونداكي شوم تداريكات
«خليجه» يوللاندي حربي گميلر
كندیمیزدن ايسه «تورك افنديلر»…
***

قارا بير توطييه، بؤيوك وسوسه
باريش علئيهينه قانلي دسيسه.
قولوموز گوجلو ايدي، اليميز اوستون،
شانلي اوردوموزون قيلينجي كسگين.
مرزيميزدن گولله گئچه بيلمزدي
اوزه رينده قوشلار اوچا بيلمزدي
اونودماق اولمازدي لئيك بونلاري
بو فيتنه كارليغي، بو اويونلاري
دوشمان ايسته ييردي آذر يوردونون
ايگيتلر يوردونون، ارلر يوردونون
حاقلي عوصيانيني عونوان ائده رك
قورتولوشونو بير بؤهتان ائده رك
صولحون بيناسيني تار و مار ائتسين
امك دونياسينا هوجوما كئچسين.
***

تاريخدن هدفه، وطنه، يولا
جان قوربان ائدنلر هيچ ده آز دئييل.
عزيزلرين قوربان وئرنلر ده وار،
(مينايا آپارميش اوغلونو خليل)
آنجاق بير ميللتين قوربان اولماسين
تاريخ گؤسترمه يير، هئچ واخت، هئچ زامان
قوي بير ده سؤيله ييم دونيالار بيلسين
صولحه قوربان اولدو آذربايجان.
***

دئدي قوي من اؤلوم ياشاسين اينسان
ووروشما اودونا يانماسين جهان.
قوي منيم وارليغيم تار و مار اولسون
آزادليق دونياسي پايدار اولسون.
قوي تالانا گئتسين بو گؤزل حيات
دونياني توتماسين بير ده ظولومات.
آچدي سرحدلرين، سيلاحين آتدي،
نامردلر الينده آل قانا باتدي.
تولكولر بورودو آسلان اوولاغين
چاققاللار قاپسادي قافلان ياتاغين.
آسلان مئشه سينه تولكو بگ اولدو،
خالقيمين ياناغي سارالدي سولدو.
***

آسلان مئشه سينه تولكو بگ اولماق
نه قدر آغيردير، نه قدر چتين؟
ذليل بايقوشلارين طرلان شيكاري،
گؤر بونا اولارمي ائله مك تمكين؟!
لئيك، آذر ائلي دؤزه رك بونا
بير داها مردلييين آشكار ائتدي.
دونيا گنجلري اؤلمه سين، ـ دييه
بير چوخ ايگيتلري اليندن گئتدي.
***
هله ده گرنه شير بير پارا قولچاق
اوتانماز اوتمانماز سارساقلاياراق!
ـ «ووروشدوم، دؤيوشدوم، غلبه چالديم»
آذربايجاني من زورونان آلديم».
تؤكدورور خالقيمين گوناهسيز قانين
تالايير يوردومون هر دؤرت بير يانين.
اؤلوم ارمغاني گؤنده رير بيزه
زيندانلار تيكديرير گنج نسليميزه.
مرد ايگيتلريمي چكديرير دارا،
يوردومون اوستونه چكيلير قارا.
***
قاري دوشمان دوو تاپاراق
آلچاقليغين وئردي نيشان
وطنيمي آل بويادي
ايگيتلرين آل قانىيلان.
جللاد اولوب بئشيكلرده
كؤرپه لرين كسدي باشين
عوممان كيمي آخيزديردي
آنالارين قانلي ياشين.
***

عاييله سي قارشيسيندا
گولله له دي آتالاري
بالكونلاردا دارا آسدي
آغ بيرچكلي آنالاري.
اينسانليغين، شرافتين
يبر دفعه ليك داشين آتدي
ناموسلو قيز گلينلرين
ناموسونا ال اوزاتدي.
قولدورلوقلا مدنييت
سارايلارين تالان ائتدي
هيتلر كيمي اينجه صنعت
اوجاقلارين ويران ائتدي.
برباد اولموش وطنيمده
بايقوش كيمي يووا سالدي
قوزغون اولوب ائللريمين
نعشي اوسته قاناد چالدي.
گونش باتدي، آي گيزلندي
دومان چؤكدو بو دييارا
آل گئيينميش شن وطنيم
چئوريليبدير بير مزارا.
هر بير دووار چاتداغيندان
هر پوسقودان، هر دليكدن
هر بير قورد قوش يوواسيندان
هر جولادان، هر دئشيكدن
اوز گيزلتميش، كمين ائتميش
بير جاناوار ياواش ياواش
ديشلريني ايتيلده رك
بيردن بيره قالديردي باش
هوجوم ائتدي، وطنيمه
كسمك دييه، باسماق دييه
ياخماق دييه، تالان دييه
اؤلوم دييه، آسماق دييه
بير سورو چالاغان، بير سورو قوزغون
بير سورو آلاباش، بير سورو مئيمون
بير سورو عقرب، بير سورو ايلان
بير سورو يان يانيش، بير سورو چايان
بير سورو ساتيلميش، بير سورو جاسوس
بير سورو …. بير سورو ….
بير ناخير كؤهنه قورد سكسن ياشيندا
فيتنه كار «جرج آلن» اونون باشيندا
سوپاسين بيزله دي يوردوما ساري
سئل كيمي بورودو بيزيم ديياري.
سولدو، وطنيمين باهاري باغي
اولدو گولشنلريم بايقوش ياتاغي
بوغولدو خالقيمين آزادليق سسي
سوسدو بولبوللرين آزاد نغمه سي
دؤندو باهاريميز زيميستان اولدو
قيزيل گوللريميز ساراليب سولدو.
***
دره نين تكينده جالانير بير چاي
داغ داشي بورويور، غملي بير هاراي
اسديكجه موغانين ايستي يئللري
آپارير هر يانا او نغمه لري
بو اودلو نغمه لر، بو زمزمه لر
قولاق آس، گؤر سنه سؤيله يير نه لر:
بوردا ايكي دونيا دورموش اوز اوزه
بوردا چاخناشيري گئجه، گوندوزه
بير ياندا آزادليق، حيات، سعادت
بير ياندا اسارت، اؤلوم، فلاكت
قارشيمدا جانلانير هر ايكي ساحيل
باغريمي ديشله يير آغير بير نيسگيل
تازا گلين كيمي بزنميش اويان
لاله دن، چيچكدن بورونموش الوان
دنيز تك اويسه نير ياشيل تارلالار
اوج اوجا دوزولموش گؤزل بينالار
چؤللرده بولود تك گورلايير موتور
شوملايير يئرلري كوتان، تراكتور
كندين اته يينده دايانير قاتار
چيخير كوپه لردن گنج ايختييار
اينساندان گول آچير بوتون داغ تپه
قاچير ياشيلليغا بير دسته كؤرپه
چمنده توپلانير گول كيمي اونلار
سونرا دا باشلانير گؤزل اويونلار
بيلميرم يوخودور، يوخسا بير رؤويا
(اوستادين سؤزلري دوشور ياديما):
«اويناشيب گولوشوب، آشيب داشيرلار»
«بعضن كهليك كيمي قاققيلداشيرلار»
«سانكي گؤرمه ميشلر نه غم، نه مئحنت»
«ياغير اوزلريندن يالنيز سعادت»
***

يئل اسير دوزلرده، اويسه نير چيچك
قوش كيمي سينمده چيرپينير اوره ك
تارلادا چاليشير بير دسته گلين
قوللاريندا زنبيل، الده بيزرچين
اگينلرده دامن، باشدا آغ چالما
سينه لر آغ مرمر، ياناقلار آلما
بير آهو گؤزلو قيز قالديرير باشين
قيريشديرير آلنين، اوينادير قاشين
شئيدا بولبول كيمي اوجالدير سسين
اوخويور يوردونون آزاد نغمه سين:
«بولوتلار داغيليب سؤكولنده دان»
«لاله دن دون گئيير، بزه نير موغان»
«گولور چيچك كيمي چؤللرده اينسان»
«چيخيرسان تارلايا سن موغان قيزي»…
***
بو تايا باخيرام، گؤرورم نه لر؟
قارغيدان تيكيلميش آلچاق كؤمه لر
چيغين داليسيندا ياتميش بير قاري
اوغرون قيزديرمادان رنگي ساپ ساري
قومسالدا بير نئچه كؤرپه اويناشير
اونلارا باخانين باغري اودلاشير
گؤزلري تراخوم، قيچلاري چيپلاق
باشلاري كئچلدن باغلاميش قاتماق.
يوز آدديمليقدا بير اوزون ساچلي قيز
قارا تيكانليقدان توپلايير ماييز
كيرلي يايليغيني چكميش قاشينا
تزك كرهلييين آلميش باشينا
گاه آدديم گؤتورور گاهدان دا دورور
بعضن بيردن بيره يئره اوتورور
چيپلاق آياقلارين يارديقجا تيكان
قورخموش آدام كيمي ديسكينير هر آن
يول اوسته اوتورموش دوشگون بير قوجا
قددينين كماني دگميش اوج اوجا
بونونلا او يئنه نيققيلداياراق
بير كوت كركي ايله يونور دوغاناق
بو ايش ايسه آنجاق اونو چوخ يورور
آرا بير ايشله يير، آرا بير دورور.
باخيرام، سومويو چيخميش اوزونه
ايچيم آلوولانير، آليشير سينه
آستا سوووشورام اونون يانيندان
سؤيله ييرم، بابا، يورولماياسان
بوزارميش گؤزلرين تيكير اؤزومه
يورغون باخيشلارلا باخير اوزومه
زارينجي بير سسله، خوش گلدين، ائدير
يئنه ده تؤوشكدن نفسي گئدير.
ايچيمده گورلايير يئنه ده طوفان
آستا سوووشورام اونون يانيندان
باغريمي ديشله يير آغير بير نيسگيل
قارشيمدا جانلانير هر ايكي ساحيل
بوردا ايكي دونيا دورموش اوز اوزه
بوردا چاخناشيري گئجه گوندوزه
بير ياندا آزادليق، حيات، سعادت
بير ياندا اسارت، اؤلوم، فلاكت
چايين اوتاييندا قاينايير حيات
بو تايي چولقاميش قارا ظولومات
او تايدا باهار وار، بو تايدا قيش وار
اورادا بولبول اوخور گول قوجاغيندا
بورادا قورويوب غونچالار قيندا.
اورادا اينسانين يارادان الي
گون به گون زور گلير كور طبيعته
عقله سيغينمايان بؤيوك قووه لر
بويوروق قولودور بشرييته
اورادا صنعتين، عئلمين اووسونو
سئلي دايانديرير، داغي قوپارير
قههار طبيعتي دگيشمك دييه
اودلو صحرالارين باغريني يارير.
بورداسا بير يانغين، بير قار، بير بوران
بير كولك، بير دولو، بير سئل، بير طوفان
خالق كنديرينين حياتين كسير
اينسان طبيعته اسيردير، اسير.
ايگيرمي سككيزين قوراقليق ايلي
كندچي كوتله لري، بو آذر ائلي
نه گونلر گؤرمه دي، چكمه دي نه لر؟
اينسان او گونلري اونودار مگر؟
***

گزيرم چؤللري، كورا يوللاري
كولك پيچيلدادير قورو كوللاري
قارشيما چيخيري بير سورو داوار
بوتون مورگوله يير كئچي قويونلار
بير بيرينه كئچميش قابيرقالاري
دوز تك يالاييرلار بوش قايالاري
اون ايكي ياشيندا كيچيك بير چوبان
چيينينده كي بؤيوك بير داغارجيغلان
ساكيت دايانميشدير، نه سمير، نه سس
گاهدان بير چكيردي دريندن نفس
اوزونده غوصصه دن گيزلي بير ايز وار
معصوم باخيشيندا بير دونيا سؤز وار.
اينتيظار گؤزلري يولدا قالميشدير
بيلمم توته ييني هاردا سالميشدير
گؤرونور چوخداندير نغمه چالمايير
داغلارا داشلارا نغمه سالمايير.
اونون دا روحونو اؤلدورموش سيتم
اونون دا گؤزلرين توتموش كدر٫ غم
اونون دا قلب ائوين ظولم الي ييخميش
بوتون نغمه لري ياديندان چيخميش.
***
دره نين تكينده جالانيري چاي
داغ دؤشو بورويور غملي بير هاراي
اسير ياماجلاردا ايستي بير كولك
ايچيمده اودلانير، آليشير اوره ك.
بوردا ايكي دونيا دورموش اوز اوزه
بوردا چاخناشيري گئجه گوندوزه
اوره ييم ايسته يير آتيلام چايي
بير دفعه ترك ائدم بو غملي تايي
تولك ترلان كيمي قول قاناد آچام
بو اوستو دومانلي اوولاقدان اوچام.
اوچام سعادتين شن دونياسينا
ايشيق دونياسينا، گئن دونياسينا.
لاكين بيردن بيره ديزلريم اسير
آغير بير سيخينتي باغريمي كسير.
قيچلاريم قورويور، قيزيشير اوزوم
باشيم گيجه لله نير، قارالير گؤزوم.
ايستيرم گؤتورم آدديم آدديمدان
ايچيمده بير قووه قيشقيرير، دايان!
قيشقيرير ترپنمه! هارا گئديرسن؟
نه اوچون يوردونو سن ترك ائديرسن؟
نه اوچون آتيرسان ياري يولداشي؟
بو دوغما ائللري، قوهوم قارداشي؟
يوخ، آتما ائللري، ترك-ى يار اولما!
وطندن ال اوزمه، بي ايلغار اولما!
كؤچري قوش كيمي اوولاقدان اوچما!
باشيني گؤتوروب وطندن قاچما!
دنيزلر داشسا دا، قوپسا دا طوفان
اصيل قوش ال اوزمز اؤز يوواسيندان.
دوزدور كي، اورا دا اؤز وطنيندير،
اؤز باغين، اؤز باغچان، اؤز چمنيندير
دوزدور كي، اورادا گولور سعادت
گولورو اينسانلار، گولور طبيعت
لاكين برباد اولموش بو غملي دييار
بو پوزغون دره لر، دومانلي داغلار
سيتم زنجيرينه باغلانان اللر
حاققي پامال اولموش اوبالار ائللر
سودونو امدييين آغ ساچلي آنا
يولونو گؤزله ين آلا گؤز سونا
هاميسي٫ هاميسي گؤز تيكميش سنه
هر اؤز ميللتينين دردين بيلنه
بو سؤنوك دودمان سنيندير، سنين
سنه گؤز تيكميشدير ايندي وطنين
ظولمته اوغراميش بو پوزغون دييار
بابكلردن قالميش سنه ياديگار.
دؤيوش مئيدانيدير، اينديليك وطن
سن ده او مئيدانين بير عسگريسن
قاچما بو داعوادان، قاچما بو دوودان
قاچما سنگريندن، قاچما بولوودان.
ووروش اؤز خالقينلا سن ده يان يانا
قير، تؤك دوشمنلري مرد-ى مردانا
قوو اؤز وطنيندن ايشغالچيلاري
هر ايستئعمارچيني، هر ظولومكاري،
قورخما، دؤيوشلرده آخسا دا قانين
ياخود دوداغيندان چيخسا دا جانين
دايان قوي دوشمنلر تار و مار اولسون
سنين ده وطنين بختييار اولسون
دوغسون قيزيل گونش، آچيلسين سحر
سنين ده ائللرين اولسون بخته ور
گول آچسين دوزلرده سونبول شلاله
قوروسون تيكانلار، گؤيرسين لاله.
بوتون كؤهنه دونيا اود توتسون يانسين
آزادليق بايراغي شن دالغالانسين.
***

قوجامان تبريزي بوروموش دومان
يوز مينلر اينساني سارسيدير حيرمان.
بوتون دودكئشلرده بوغولمومش نفس
هئچ بير سيويستوودان چيخمايير بير سس
سوسوب چاليشقانليق، دايانيب زحمت
بوتون هر طرفي بورويوب دهشت.
قارالديب گؤيلري ظولمون غوباري
ياغيب يئر اوزونه فلاكت قاري
بوتون كارگر الي قوينوندا
معيشتين آغير يوكو بوينوندا
قاليب كوچه لرده سفيل سرگردان
كسيب آمانيني ايشسيزليك، حيرمان
كندچي كروانلاري توتموش يوللاري
گلير هر طرفدن اينسان قاتاري
يانيقليغا دوشموش يازيق اوبالي
چاريق پاتاوالي، ييرتيق چوخالي
بوتون وار يوخونو دالينا آلميش
چيپلاق اوشاقلارين يانينا سالميش
سئل كيمي آخيشير شهره هر ياندان
آرا هشتريدن، آرا موغاندان.
***

هر قاپيدا بير جوت چييني توربالي
گؤز ياشي آخيدير، ديله نير چؤره ك
سويوق آلازلايير لوت بدنلري
سوموك سيزيلدايير، قووشور كوره ك.
گرمخنالار دا اؤلوم قوخويور
آجليق اينسانلارا كفن توخويور.
***
گئجه دير، هر يانا كؤچوب قارانليق
بوتون طبيعتي دونداريب سويوق
كولك ويييلدايير، بوران اووسه نير
سانكي، گؤيدن يئره كافور اله نير.
بير مزار كيميدير بوتون كايينات
طبيعت بورونوب قاردان آغ حيات
يولون قيراغيندا چكيبدير قاتار
بير سيرا كله مه كؤتور داخمالار
هانسىسيندان ايسه سولغون بير ايشيق
بويلانير ائشييه توستو قاريشيق.
(آغير آدديملارلا ياريرام قاري
ايره ليله ييرم، داخمايا ساري)
ايشيغين قارشيسي كسيلير بير آن
چيخير ايچريدن مفلوك بير اينسان
قانشاردا دايانير جانسيز هئيكلي
قارشيما اوزانير دامارلي الي:
ـ رحم ائت، منه آغا! ياماندير حاليم
بير هفته دن چوخدور آجدير عياليم
(دئيه ن بير قوجادير، آخيدير ياشين
شرميندن يوخاري قالديرمير باشين)
هارادانسا گلير سيزيلتي سسي
بير ييغين اينسانين حزين ناله سي
گئجه نين باغريني يارير ناله لر
قونور خاطيريمه آغير بير كدر.
ايچه ريم آليشير، باغريم اودلانير
روحوم شؤعله چكير، اوره ييم يانير.
باخديقجا بو محروم، سفيل اينسانا
ايچيمده نيفرتدن قوپور فيرتانا.
نيفرت تانريلارين پوچ رؤوياسينا
بو كور قورولوشون شوم دونياسينا
دوشونورم، كيمدير بو دوشگون سفيل
قوجا اكينچيدير، ديلنچي دئييل.
***
هله اللريندن گئتمه ميش اونون
اوراغين، شنه نين ايلليك قاباري
هئچ زامان يوخودا گؤرمه ميش اونو
سحر گونشينين ايلك شؤعالاري
***
دوشونورم كيمدير بو محكوم اينسان
اودور روزو وئرن، او دور يارادان
«منه رحم ائله يين»، دئيه او ديللر
سووالا آچيلان بو قابار اللر
سويوقدان تيتره ين او معصوم اوشاق
بينوشه يه دؤنموش او لاله ياناق
او، سعادتلي بير رحمت اليدير
وطن غونچاسيدير، وطن گولودور.
اونوندور بو عالم، اونوندور جهان
اونون امه يىيله ياشايير اينسان
باغريما باسيرام دوشگون قوجاني
اؤپورم الينين قابارلاريني
حؤرمتله اليني اليمه آليب
محببت قولومو بوينونا ساليب
ـ دئمه ائحسان ائله، رحم ائله منه
من كي وارليغيمي بورجلويام سنه.
سنيندير حياتيم، يئديييم چؤره ك
سنيمدير كؤكسومده چيرپينان اوره ك
سنيندير ايليييم، سنيندير قانيم
سنيندير وارليغيم، سنيدير جانيم.
سنين زحمتيندير مني يارادان
سنين مئحنتيندير مني اويادان.
بو، گونشدن آيدين بير حقيقتدير
اينسانين وارليغي سنه ميننتدير.
او، قابار اللر كي، قاپ قارا يانميش
او يورغون گؤزلر كي، غمدن اوسانميش
او، قارا قويلانان دونموش آياقلار
كؤمور تك قارالان يانميش دوداقلار
بوتون كئچيردييين او قارا گونلر
اوره ييني سيخان آغير دويونلر
دميرچىخانادا دؤيدويون دمير
بوتون مشققتله سوردويون عؤمور
ايستيسي جيسميني يانديران گونش
شوملاديغين يئرلر، دردييين كولش
ايشيغيندا بوغدا سووردوغون آي
عؤمرونو چورودن ياز، پاييز، قيش، ياي
قولونا باغلانان ايپلرين يئري
تورپاغا تؤكدويون آلنينين تري
اوزه رينده كله ك قوردوغون داغلار
اكيب بئجردييين صفالي باغلار
هاميسي٫ هاميسي شاهيددير كي، من
سنه ميننتدارام دوغولان گوندن.
***
بو تك من دئييلم، دونيا بيلير كي
سن بشرييته روزو وئره نسن
اينان كي، حياتين اوجاغي سؤنور
اگر سن اكمه سن، سن ايشله مه سن.
***
قوجا ساكيت ساكيت باخير اوزومه
سونرا دا چاتيلير آغارميش قاشي
نه لر دوشونورسه سؤزلريمدن او
معنالي معنالي ييرغانير باشي.
***
ـ نه دئييرسن اوغول، كسيلميش چارام
بير كره اوزولموش هر ياندان اليم
هاني امه ييمين قدريني بيلن
دونيانين ظولموندن بوكولموش بئليم.
نه لر چكمه ميشدير بلالي باشيم
نه لر اوخوموشام، نه لر چالميشام
بودور حياتيمين سون سرانجامي
ديوارلار ديبينده مه لر قالميشام.
منه بو دؤورانين وفاسي بودور
بير عؤمور مشققت، عاقيبت سووال
يئتميش ايل چاليشماق، يئتميش ايل زحمت
آخيرسي اولموشدور بوينوما ويبال.
هانسي گون عؤمرومده من شاد اولموشام
گونوم، بختيم كيمي، قارالميش هر آن
يئتميش ايل چاليشديم، چوخ جفا چكديرم
بيرجه خوش ساعاتدان تاپماديم نيشان.
ـ ياددان چيخارميشسان بس او بير ايلي؟
منله بير سنگرده ياتان زاماني؟
يوخسا اونودموشسان او خوش گونلري
او خوشبخت حياتي، او شن دؤوراني؟
ـ اوخ، دئمه! تاريخين قارانليغيندا
او ايل بير آي ايدي، دوغدو دا باتدي
عؤمور چيچكلندي آنجاق بير باهار
لاكين، گوللريني ياناغين ساراتدي.
قرنلر ظولمتدن، دوماندان سونرا
بير گونش دوغدو، بير ايل ياز اولدو
لاكين، او يئگانه شن باهارين دا
بير قيزيل گول قدر عؤمرو آز اولدو
خالق حؤكومتينين شن دؤورانيندا
آنجاق بيز آنلاديق عؤمرون لذذتين
دئديك: آخشاميميز سحره دؤندو
اليندن قورتارديق ظولمون، ذيللتين
دئمه غصبكارين قارا كينه سي
او حياتي بيزه قويماياجاقميش
دئمه اكديييميز اوميد زميسين
قولدورلار اود ووروب يانديراجاقميش.
ريضاخان اوغلونون زييانكار الي
او حياتي بيزه قالا قويمادي
او قودوز، ميليونلار ايران خالقينين
قانيني بوسبوتون سوردو، دويمادي.
ـ يوخ آتا، داريخما، بو قارا دؤوران
بو توستو، بو دومان، بو قار، بو بوران
چوخ چكمز، ايشيق بير باهارا دؤنر
يئنه ده حياتين گولشني گولر.
ياتار قارلي قيشين سويوق يئللري
آچار شن باهارين قيزيل گوللري
بيزيمدير گله جك، بؤيوك گله جك
تاریخ جللادلارا باش اگمه يه جك
***
بئش ميليون زحمتكئش محروم اينسانا
دئمك «نجات تاپميش» آذربايجانا
ريضاخان اوغلونون ظولوم تؤحفه سي
فلاكت تؤحفه سي، اؤلوم تؤحفه سي
وطني بورويوب قانلي بير دهشت
سارسيدير خالقيمي آجليق، فلاكت
كسير نفسلري سونگو، زيندان٫ دار
تيكيليب دوداقلار، باغلانيب قوللار.
***
لاكين، تاريخ بويو بو بؤيوك دييار
تسليم اولماميشدير و اولماياجاق.
دوغما تورپاغيمدا قودوز دوشمانا
اگر يئر وارديرسا، مزار اولاجاق.
دؤنمز ايگيتلرين هر شراييطده
موبارزه سينين ايدامه سي وار.
شانلي فيرقه ميزين سوسدورولمايان
قورتولوش نغمه سي، ايلهام سسي وار.
قانلي دوداقلاردا سؤزلر قانليدير
ديلكلر ده قاندير، اوركلر ده قان
جيلوو گميريري قان آلماق دييه
هر يئريندن دوران، هر باش قالديران.
يوردوم، اودلار يوردو، آذربايجاندير
مردلييين آلينماز مؤحكم قالاسي
يوردوم باش اگمه ميش ايسكندرلره
گلمه ميشدير يئره ايگيت آرخاسي.
يوردوم، بابكلرين ياديگاريدير
هر تولكو بورادان باج آپارانماز
ائليمين غضبي طوغيانا گلسه
آسلانلار اليندن جان قورتارانماز.
ظاليم، ساغ باش گورا آپارا بيلمز
اوغرو چيراغينين اولماز ايشيغي
اگري ايلان تئزراق گولله يه گلر
دوشماني بوغاجاق اؤز قارانليغي.
چكمه سي ماميزلي، اگري پاپاقلي
اوز گؤزو پودرالي، چييني ياراقلي
دانيشاندا مين جور عيشوه لر ساتان
هر اؤتن قادينا بير قاش گؤز آتان
شاهليق قوشونون « دون كيشوتلاري »
تولك تولكولري، قوجا قوردلاري
باش آپارماياجاق آذر يوردوندان
ارنلر يوردوندان، ارلر يوردوندان.
***
گوناهسيز تؤكولن ناحاق قانلارين
هر داملاسيندان بير بابك قالخاجاق
طوفانلار قوپاجاق ائل غضبيندن
دوشمانين گؤزونه شيمشك چاخاجاق.
قانا باتميش ظاليم اللره قارشي
قالخاجاق ائللرين اينتيقام الي
سون ظفر شوبهه سيز كوتله لريندير
غاليب گله جكدير خالقين املي.
گئجه هر نه قدر اوزون اولسا دا
سحر آچيلاجاق، گونش دوغاجاق
بو سؤز داها بوگون افسانه دئييل
«ايشيق قارانليغي بير گون بوغاجاق»
داراديقجا گونش ساري تئللرين
گئده جك سهندين باشينين قاري
كل چيچكلر اوسته اينجي سپه جك
دومانلي داغلارين بوز بولوتلاري.
يئنه يوردوموزا باهار گله جك
سولغون گوللريميز يئنه گوله جك
تاريخ جللادلارا باش اگمه يه جك
بيزيمدير گله جك، بؤيوك گله جك.

تبريز ۱۳۲۸

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: