گويچه ماحالي و خسته بايرامعلي یازان: حسين سيامي

دوزلو اوغلان وبلاگلارینین یاخشی اولماقی اوچون آتیل باتیل فروشگاهین دان آلیش وئریش ائدین

گويچه ماحالي و خسته بايرامعلي   یازان:  حسين سيامي

خسته بايرامعلي قديم گؤيچه ماحاليندا ياشاميش، قوشما، گرايلي، غزل، تجنيس، مخمس ژانرلاريندا شعرلر يازميشدير. شاعير هم كلاسيك، هم ده شفاهي خالق ادبياتي عنعنه لريندن بهره لنميش، اثرلرينده انسان سعادتي، خوشبختليك، محبت، آزادليق كيمي عموم بشري ايده آللاري ترنوم ائتميشدير.
گويچه ادبي محيطي نين خسته بايرامعلي يه قدركي دؤرو يالنيز عاشيق ياراديجيلغي چرچيوه سينده انكشاف ائتميشدير بو قدرتلي ائل شاعيري نين بو عائله گليشي گؤيچه شعر دونياسينا يئني بير نفس گتيرميش، بونون احوال- روحيه سيني تزه لميشدير. قوشمالاري نين و مخمسلرينين معاصر ليي اورژينال غزللري و حكايه لري باشليغي آلتيندا يازديغي ائپيك- ليريك قوشما شكيلي اثرلري كناردا چيخارميش، كلاسيك نغمه‌لره اساسلانان اسلوبو و شيرين، آخيجي ديلي بو شاعرين اؤزونه مخصوص جهتلريني بارز شكليده اظهار ائتميشدير.
هر بيري آيريجا بير بيتگين صنعت نمونه سي اولان ((قوجانين حكايتي)) ((عزرائيلين حكايتي)) (( ديلنجي حكايتي)) و ((ايكي دوستون حكايتي)) كيمي اثرلري آيريليقدا مودريك كماللي بير احوالاتين، نظم اثرلرين كامل تصويريدير.
اونون مختلف شعرلري آراسيندا مضمون و معنا باخيميندان، خصوصي ماراق دوغوران، صنعت اينجي لري واردير.
بير نادان آغاران ساچيما گولدو
عؤمروم خانه سيندن مين داش سوكولدو
دئييرلر: قامتين نه تئز بوكولدو؟
دئييرم فلكدن ناگهان منم
حيات اوحياتدي، قوجالان منم
54 ايل عؤمور سورن اؤلمز صنعتكارين جوان ايكن قوجاليقدان شكايتي تصادفي دئييل دير. اونون حياتيندا چكديگي طالع آغريلاريني ((آغري)) داغيدا چكه بيلمزدي. بونونلا بئله فلكين آمانسيز اويونلارينا مردليكله سينه گرن، بير نئچه ايل عرضينده دالبادال سينه سينه 7 اوغول، بير قيز، بير باجي، بير قارداش داغي چكيلن بوداغ اوركلي آدام اؤز نيك بين دويغولاري ايله بوتون فاجعه لره اوستون گلميشدير.
ياخشيلارا ياخشيليغي آداولار،
ياخين دونوب، يامان گونده ياداولار گوز ياشيني دوشمن گورسه شاداولار
آغلاسان پنهاندا آغلا اوره‌ييم
– دئين صنعتكار عؤمورونون ان غملي دقيقه لرينده ده نيك بين ياشاميشدير. كؤرپه واختيندان يتيم قالان، دائما عذاب- اذيتله قاتلاشان، طالعين آغير امتحانلاريندان چيخان و اولمازين مصيبتلرله اوزلشن اوجا بويلو، ساغلام بدنلي، پهلوان هيكل‌لي بايرامعلي نين اؤزونه ((خسته)) لقبي گؤتورمه‌يي ده محض زمانين و محيطين كشمكشلي اويونلاري ايله باغلي اولموشدور.
خسته بايرامعلي سينه دفتر، اولدوقجا ساوادلي، هاردا، كيمه و نه دئمه‌يي باجاران، اولدوقجا جسارتلي يعني خالق يولوندا جانيندان كئچمه‌يه حاضير اولان صنعتكار ايدي، بير سؤزله شاعيره خاص اولان بوتون خصوصيتلر اوندا جمع لنميشدير.
خسته بايرامعلي اجتماعي تربيه چيدير، او، اخلاقيني، بيليگيني خالقا چاتديرماغي باجاران شاعير ايدي او، هم‌ده فيلسوف شاعيردي، فيكيرلرينين مركزينده ((جمعيتين كاميللييي فلسفه سي‌نين حياتي ليينيده دير)) ايده آلي دورور.
جمعيتي دوشوندوكجه بوتون سواللاري فلسفي باخيشلا تحليل ائدير.
خسته بايرامعلي ياراديجيليغيندا وطنپرورليك، ديلينه، خاليقينا باغليليق اولدوغو حالدا، اجتماعي، سياسي دير چوخ خالقي دوشوندورون موضوعلارادا اؤز اثرلرينده يئر وئر ميشدير.
نهايت خسته بايرامعلي ليريك نغمه لر اوستادي دير. ليريكا اونون ياراديجيليغينين اساسيني تشكيل ائده‌رك، محبتيني الهي بير يوكسكليگه قالديرير. شاعيرين ليريك قهرماني اينجه بئللي، قاراتئللي، ترياناقلي آذربايجان گؤزه‌ليدير.
بايرامعلي حساس، كؤورك، اينجه قلبلي اولدوغو قده‌ر و وقارلي، عارف، كماللي و صراف باخيشليدي. او هر يئتن گؤزله ميل ائله‌مز. سئودگي گؤزلي عقلينه، ذكاسينا گؤره ترنوم ائديب، اصلينه، ذاتينا، نسيل- نجابتينه گؤره قيمت وئرير.
بايرامعلي هر يئتنه وورولما،
خوب گؤزلين اصلي، ذاتي گركدي.
او، فردي محبتي بشري سئوگييه چئويريب علوي دويغولارين ترنومونه قوشولور. بوعلوي محبت انساني نجيبلشديرير. اوندان وفا، فداكارليق كيمي گؤزل، انساني كيفيتلر تربيت ائدير. اونون الاهي پري لي گؤزلليكده مثيل سيز اولان مارالي، داغلار قيزي ((لاله)) دير.
گؤزلليگي ديللر ازبري اولان بو داغلار گؤزلي بايرامعلي نين عومور كتابينا دؤنوب آچيلديقجا آچيلير، اوخوندوقجا اوخونور…
شكر ازيب هم دوداغا، ديله‌رسن
خوش آرزولار، خوش نيتلر ديله‌رسن
من دليلي سالدين ديلدن- ديله‌رسن
بايرامعلي خسته دوشوب بئله، يار.
خسته بايرامعلي بوتون عؤمور بويو بير آدين قولو اولوب، بير آدين ترنومونه چاليشيب، ((ناغي قيزي لاله)) آدي.
وارليغين عشقيمين تمنا سيدير،
گؤزلرين كؤنلومون اؤز دونياسيدير.
اؤلونجه اوره‌ييم ياشاداسيدير،
ايلك آديم اؤزومو، سون آديم سني.
بئله جه عشقينين يولوندا اسيم- اسيم اسديگي ديلبر اونون عؤمرونون معنا سينا چئوريليب ياراديجيليغينا گوجلو تكان وئرير.
آغير نسيل- نجابتلي بير نسليدن، ايمكانلي بير عائله دن اولان ((لاله)) دؤورون قانونلارينا اعتراض سسيني اوجالديب، علوي محبتينه صاديق قالير. يوخسول بايرامعلي يه كؤنول وئرمكله اؤزونو دونيانين خوشبختي سايير.
((لاله)) ان چتين آنلاردا بئله بايرامعلي يه آرخا، كمك، ياخين سيرداش اولماغا چاليشير. سونرالار بو خوشبختليك اوزون چكمير. فلك سانكي بو صميمي، مهربان عائله نين قصدينه دوروب، بير- بيرينين آردينجا اونلارين سينه سينه يئددي اوغول، بير قيز داغي چكمكله تپه دن- ديرناغا يانديريب كولونو چيخارير. بودردلر، آغري اجيلار آزميش كيمي باشي مين جور- جفا چكميش بايرامعلي عائله سي نين ايكينجي سيناق دوورو باشلانير.
قانلي- قادالي محاربه ايللري، حسرت، انتظار، دؤزوم، ديانت دونوندا ايكي سئون قلبي بيرده امتحانا چكير.
ياغي دوشمنه قارشي قهرمانليقلا ووروشان خسته بايرامعلي بير آن دا اولسون عائله سيني اونودا بيلميردي بوزلو سنگرلرده لاله سي نين عشقيله دؤيوشن شاعير يوزدن آرتيق مكتوب، شعر گؤندرميشدي اونا.
دئمه اوزاق دوشدوم، آي ناغي قيزي،
بو آيريليق بير گون اؤتر داريخما…
خسته بايرامعلي ائتمز آه و زار،
دارگونده اييلمز ديانتيم وار.
بير گون گلر پوهره لرده گول آچار،
باغچا ميزدا بولبول اؤتر داريخما.
عؤمور بويو خسته بايرامعلي ايله، يولداش اولان عذاب- اذيت محاربه ايللريندن سونرادا اونون ياخاسيني بوراخماميش، نهايت 1952- نجي ايلده شاعير اسرارانگيز بير حالدا زكام خسته ليگيندن رايون خسته ناناسيندا دييشدي.
گويچه ماحالي اينديكي ائرمنستان جمهوريتينده يئرلشير. هله شاعيري تورپاغا تاپشيرماميش عائله سيندن شاعيرين بوتون سندلريني دولت آرخيوينده ساخلاماق اوچون طلب ائتميشلر. سندلرله برابر بوتون ال يازمالارين، شعرلر و حكايه‌لريني ده آپاريب محو ائتميشلر.
شاعرين كؤرپه اوغلو ((ماشلاللاه)) بؤيريوب بويا- باشا چاتديقدان سونرا اونون شعرلريني بير- بير سينه لردن توپلاييب، نهايت 1987- نجي ايلده خسته بايرامعلي نين ((منيم گؤيچه‌م)) آدلي شعرلر كتابي ايشيق اوزو گؤردو.

Bir Cavab

  1. […] گويچه ماحالي و خسته بايرامعلي یازان: حسين سيامي […]

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: