نازلامالار و آرزولامالار یازان: علي.ب.تورک

دوزلو اوغلان وبلاگلارینین یاخشی اولماقی اوچون آتیل باتیل فروشگاهین دان آلیش وئریش ائدین

نازلامالار و آرزولامالار  یازان:  علي.ب.تورک

آذربايجان خالق ادبياتنين بويوک بير حيصه سيني احتفاء ائدن بولوملردن بيريده کيچيک و کورپه اوشاقلار اوچون ياراديلان لايلالار؛نازلامالار؛آرزولامالار؛اوخشادمالار،دير کي آنالار اوزجان-جيگرلري اوچون ان صاف دويغولارلا کورپه اوشاقلارينا دونيايا گوزآچان گوندن بري آنا سودو کيمي اونلارا وئريلير.اوشاقلارکورپه ليکدن بيرآز سوموگه دولدوب ديرچلديکلريندن سونرا آنالار و اوشاقين ياخينلاري اونلاراوچون گوزل آرزولاروديلکلريني قيسا اوخوماقلا شکلينده اوز بالالارينا اوخويارلار.نازلامالار و آرزولامالار ؛اوشاقلاري تومارلايا-تومارلايا اوخونوب ؛اوشاقلار اوچون ايلک اويناماق و اويون سوزلري ده سايلا بيلير.
آشاغيدا گلن سوزلرتوپلوسو آذربايجانين بيرچوخ يئرينده و بولکسينده پئشيتلي و آزاجيق فرقله اوخونسادا بوردا گلن نازلامالار تبريز و اونون اطراف کندلرو شهرلرينين آغيزلارينادان دئيليب .
ايكي  ميصراعلي نازلامالارين شكيللري سوال و جواب اولار.
   بالاما قوربان اينكللر                 بالام نه واخت ايمكلر؟     (چوخ يئرلرده نه واخت يئرينه هاچان دئيلر)
   بالاما قوربان ايلانلار                 بالام نه واخت ديل آنلار؟
   بالاما قوربان دايلاخلار              بالام نه واخت اويناخلار؟
   بالاما قوربان سئرچه لر            بالام نه واخت ديرچللر؟
   بالاما قوربان بيزوولار               بالام نه واخت دوز اوينار؟
   بالاماقوربان دايجالار                بالام نه واخت ال چالار؟
   بالاما قوربان خالاسي             بالام قيزيل پاراسي.
   بالاما قوربان كتديلر                 بالامي نه اوورتديللر
   بالاما قوربان مئيوه لر               بالام نه واخت ائولنر؟
   بالاما قوربان بيزوولار                بالام هاچان قيز اولار؟
   چاخام چالخام ياغ اولسون       اوغلوم يئسين ساغ اولسون
ايكي ميصراعلي شعيرلردن باشقادا نئچه بيتلي نازلامالاروارديلار كي اوناردا بنزرليقي باياتي كيميدير و لايلايلاردا چوخ بنزرليكلري واردير.
   داغدا داريلار
سونبولو ساريلار
بو بالاما قوربان
قوجا قاريلار
   ايگيت قالاسين ايستر
داغين لالاسين ايستر
من بالامي ايسته رم
بالام بالامي ايستر
   آللاه سن بونون تاييني وئر
اوخونو گيزلت ياييني وئر
اولانلاراينكين ساخلا
اولمايانلارين پاييني وئر
   بويا بوخونا دول گز
بوينوما دولا قول گز
جوانلارسيره منيده
سن ده بير ايگيت اول گز
   آللاه بوندان قالميشلاردا وئر
مامايولو دويموشلره ده وئر
بيزه وئرديين شوكر اولسون
ديبك ديبي دويموشلرده وئر
   داري داريلار يارپاغي                  (جور جورلر ياپراغي)
آستانالار تورپاغي
هركيم بوني ايستمير
گوزونه بيبر يارپاغي
   آتيم توتوم بالامي
شكره قاتيم بالامي
باباسي ائوه گلنده
قاباغا توتوم بالامي
   شان باغلايان آري لار
قونار گوله ساري لار
بالاما قوربان اولسون
ياشي توتموش قاري لار
   دادلي قيزام گلين آلين
كبينيمه كندلر سالين
بيردانا قيزام گلين آلين
كبينيمه يوز كند سالين
   داغ باشيندا قالام وار
اورگيمده يارام وار
خلقين دوولتي مالي
منيم ده بير بالام وار
   داري داريلار خرمني
سونبولو ساري خرمني
بالامي قاچيرديلار
دايسي وئره ر جرمني
   يايليغي كيرلي بالام
اورگي فيكيرلي بالام
تاي توشلارين ايچينده
منيم شكيل لي بالام
   آللاه بوندان بئش اوليدي
ائولر،ائشيك لر ده اوليدي
عالمده بئش – بئش اولاندا
بيزده اون بئش اوليدي
   يول اوسته بولاق اولام
آخارام – بولاق اولام
سن منيم اوز بالامسان
اوزوم گوز – قولاق اولام
   قالالار، آي قالالار
لاچين اوردا بالالار
لاچين بالاسين وئرمز
بلكه زورلا آلالار
   بالام بي رسويون گوروم
سروتك بويون گوروم
تانريدان آرزيم بودور
بالامين تويون گوروم
   قاپيميزدا وار چينار
ياپراقي دينار دينار
منيم بالام كورپدي
ساخلاسين پرورديگار
   قوخوسو گولدن گلر
گولدن ،بولبولدن گلر
بالامين گول بئشيكده
يوخوسو بيردن گلر
   من عاشيق قوزو قوربان
قوچ قوربان قوزو قوربان
هر سحر بويون گورسه م
كسه رم قوزو قوربان
   عزيزيم آسما مني
هاي – كويه باسما مني
قويما تيفيل آغلايا
آغيزينا باس مه مه ني
   بالاما قوزو قوربان
قوچ قوربان قوزو قوربان
قوربان قبول اولماسا
قوي آنان اوزي قوربان
   خيرداجاسان ،مزه سن
سن هر گولدن تزه سن
اوگونه قوربان اولوم
ديپير – ديپير گزه سن
   قرنفيليم،قالخارام
آچيلماقا قورخارام
گئجه جينگيرين چيخسا
يئريمدن ديک قالخارام
   اوغول سن ياراغيمسان
گوزگوم سن داراغيمسان
هر گون لازم اولماسان
دار گونومده داراغيمسان
   دريا دولو ليلي لن
بالام اوينار گولويلن
عالمه جان باغيشلار
مني ساخلار ديلي لن
   بال اولار بال اولار
يئل اسر فغان اولار
بالا گزن يئرلرده
آنالار قوربان اولار
   باغچالار باغا دونسون
باغيم ياييلاغا دونسون
بيرجه كلمه سوز دانيش
اورگيم باغا دونسون
   اوبالار اوبانيز اولسون
بير بئله بالانيز اولسون
هاميدا بئش- بئش اولسون
گوي بيزده اون بئش اولسون
   اوبالار كوچون يوردوموزدان
بالام دوشسون آردينيزدان
قوزونوزا هئش دئسين
تويوغونوزا كيش دئسين
   آنان تئل دوزر سنه
باجين گول دوزر سنه
تانريدان عهديم بودور
نظر ديمه سين سنه
   باشينا من دولانيم
من دونوم ،من دولانيم
سني آللاه ساخلاسين
ساينده من دولانيم
   آتينان توتدوم سني
عجب آووتودوم سني
جان قويدوم جفا چكديم
شوكور سني بويوتدوم
   بالام سان بيردانامسان
صدفده،دوردانامسان
من اولسم سنه قوربان
سن اولمه بير دانامسان
   اوخشاسين ديليم سني
بويوتسون ائليم سني
ميداندا آت اويناداندا
بير ايگيت بيليم سني
   دريا اولام ،بولانام
سوجاغاولام ،سولانام
ساغ گوزوم سنه قوربان
سول گوزمله ن  دولانام
   من دئييرم آي اولماز
ياز اولماسا ياي اولماز
چوخ انالار قيز دوغوب
بيزيم قيزا تاي قيز اولماز
   تولوق سني آسايديم
ياغلي تاسا ياسايديم
اوغلوم بويوک اولاندا
قيلپي قازان آسايديم
   قرنفيلم،قالخارام
آچيلماقا قالخارام
گئجه جينقيرين چيخسا
يئريندن ديك قالخارام
   دريا دولي ليلينه ن
بالام اوينار گولونه ن
عالمه جان باغيشلار
من ساخلار ديلينه ن
   داغداكي آتلار
آتلار گوي اوتلار
تنبل آروادلار
وبالام قوربان
   گلين چيخاق داملارا
يالواراق آداملارا
چادير قوراق ،سو لوياق
دده ن گلن يولارا
     چايير دير؛دنيزدير
قولدور ،كنيزدير
بالام هر نه دير
منه عزيز دير
     توستو سوزداملار
ساري باداملار
گويچك آروادلار
بو بالاما قوربان
اوشاقين الرينده ن توتوب يئريدنده بو نازلاماني سويللر:
   تاتان بالام ؛تاتان
تاتلي بالام ؛تاتان
   پاپيلي فريك
چيخما ديوارا
چالقالان وورار
قالام آوارا
ساغ آياقين سونباقوتور              (بو ايكي بيتي اوزالدا- اوزالدا اوخورلار)
سول آياقين سونبا قوتور
اوشاقين اللريني توتوب چپيک چالديراراقاوخورلار:
   چپان – چپان اللري
اپبک ياپان اللري    ويا  ….     ايپک يالان اللري
اوشاقين ساچلارين تومارلاياراق بو شعري اوخورلار:
   بو كيمدي كيمدي كيمدي
تئلري بو كوم بو كومدي
آتاسي دئير مولكومدي
آناسي دئير ايلكيمدي
بيريسي اوشاقين بويوتمه لرنين چتينليكلريندن آنايا سوزاچاندا ،اوشاقين آناسي جوابيندا دئير:
   بالا دادي،بال دادي
بالا آدام آلادي
شيريني ،شيرين اولار
آجيسيدا ،بال دادي
قايين آنالار ،نوه لريني قوجاقلارينا آلاراق گلينه آجيقلانديرماق اوچون بو نازلاماني اوخورلار:
   سارمساغيم،سوغانيم
ياد قيزيندان اولانيم
بابانا جانيم قوربان
ننه ن اولسون قوربانيم
يادا بوني دئيللر:
   ياريسي بالام بالاسي
ياريسي ايلان بالاسي
اوشاقلارين ياخينلاريدا اوشاقا نازلاما اوخويارلار؛اونلاردان بعضي سي بئله دي:
   سود ديبي قايماق ديبي
قوربانين اولسون بي بي
   سود يالا؛قايماق يالا
قوربانين اولسون خالا
بونازلاما تكجه قيز اوشاقي اوچون اوخونار،اوشاقي ال اوسته توتوب بونازماني اوخورلار:
   گوزگوده دويمه
توزوني سيلمه
خونچادا تيرمه              (بيرجوت چكمه)
گلر قيزيم اوچون!
ماهمانات باغي
ياشيل ياپراغي
قيزيل بئل باغي
گلر قيزيم اوچون!
نوبار ياناغي
گزر اويناغي
بير جوت قول باغي
گلر قيزيم اوچون!
هر ياني گوزوك
ايلقاردا دوزوك
بيرليان اوزوك
گلر قيزيم اوچون!
دورار نامازدان
الينده قوران
بيردنه يورقان
گلر قيزيم اوچون!
آلتيندان خونچا
چالار كامانچا
اون دانا خونچا
گلر قيزيم اوچون!
آغ مايا اللر
بئلبنده كمر
قيزيل دويمه لر
گلر قيزيم اوچون!
داغلاردا جئيران
بو قيزا قوربان
اون خارا تومان
گلر قيزيم اوچون!
الينده وار دف
اوستونده صدف
بير زرلي اورپك
گلر قيزيم اوچون!
گويده گئدن قاز
ديمدگي الماس
بير دانا ناز- ناز
گلر قيزيم اوچون!
هيواسي ؛ناري
الينده باري
اون ساپ ميرواري
گلر قيزيم اوچون!
آنالار قيزاوشاقلارينين شيرينليقلارين تعريفي اوچون دئيلر:
   يايلاقلارين يوغوردي
بوقيزي(گوزلي)کيم دوغوردي
بوقيزي دوغوران آنا
بالي لان اونو يوغوردي؟
اوشاقي اوينادا –اوينادا بو نازلامالاري جور-به-جور واريانتلارلا اوخويوب اوينادارلار:
1)ماماني آي ماماني                                   2)ماماني ماماني
بالام كيمي گول هاني                                  تار ساخلاسين بالامي
گول هاني بولبول هاني                               آناني هم آتاني
بالام گول تك آچاجاق                                  ماماني ماماني
يوردا عطير ساچاجاق                                بالامي ياخشي تاني
اوخوياجاق يازاجاق                                  بالام گئجه لر ياتار
آباسينين اليندن                                       سحر تئزدن اوياني
آتاسينين ديليندن                                     او منه يولداش اولار
شيرين سوزلر يازاجاق                             كونلومه سيرداش اولار
آدليم شاعير اولاجاق
3)ماماني ماماني                                      4)اوهئ بئهئ ماماني
هوقوشلار يئدي ساماني                              ائشكلر يئدي ساماني
هاني بوقيزين توماني                                هاني بو قيزين توماني
توماني آغاج باشيندا                                 اودوبا  آغاج باشيندا
دايسي گلين توشوندا                                واي!قارا پيشيك آپاردي
دايسي تاپار گتيره ر                                توماني دوشوك آپاردي
جيبينه تپر گتيره ر
——————————————————————

فايدالانان بيرنئچه قايناق کيتاب:

1)سايالار- د.م.صديق- 1347
2)سايالار- ز.وفائي – 1379
3)آذربايجان فولکلوري يکانات- ه.حصاري – 1379
4)تورک خالق ادبياتي- م.ع.صرافي

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: